ဧရာဝတီတိုင်းဒေသကြီး ရှေးဦးအရွယ်ကလေးသူငယ် ပြုစုပျိုးထောင်ရေးနှင့် ဖွံ့ဖြိုးရေးလုပ်ငန်း ကြီးကြပ်ရေးအဖွဲ့ဥက္ကဋ္ဌ၊ လူမှုရေးဝန်ကြီး ဦးခင်မောင်ကြည်နှင့် အဖွဲ့ဝင်များသည် ယနေ့တွင် ရှေးဦးအရွယ်ကလေးသူငယ် ပြုစုပျိုးထောင်ရေးနှင့် ဖွံ့ဖြိုးရေးလုပ်ငန်းဥပဒေအရ တည်ထောင်ခွင့်ပြုမိန့် လျှောက်ထားလာသည့် ပုသိမ်မြို့ပေါ်ရှိ ပုဂ္ဂလိကမူလတန်းကြိုကျောင်းများအား သတ်မှတ်စံချိန်စံညွှန်းများနှင့် ကိုက်ညီမှုရှိ၊ မရှိ၊ သင်ခန်းစာအစီအစဉ်များ ရေးဆွဲ၍ သင်ယူမှုနေရာများနှင့် ကိုက်ညီစွာ သင်ကြားပို့ချနိုင်မှု၊ ကျန်းမာရေးဆိုင်ရာ သတ်မှတ်ချက်များနှင့် ကိုက်ညီမှုရှိ၊ မရှိတို့ကို ကြည့်ရှုစစ်ဆေး၍ တည်ထောင်ခွင့်ပြုမိန့် ထုတ်ပေးနိုင်ရေးအတွက် စိစစ်ဆောင်ရွက်ခဲ့ကြသည်။

ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် တာဝန်ရှိသူများနှင့်အတူ ကျုံကဒွန်း-စက်ဆန်းပေါ်၌ တံတား ဦးစီးဌာန၊ တည်ဆောက်ရေးအဖွဲ့(၄) တံတားအထူးအဖွဲ့(၁၅)မှ ငါးဂွတံတား(၆၆)ပေ တည်ဆောက် ခြင်းလုပ်ငန်း၊ ကျုံကဒွန်း(ကမာပို)-ဘုန်းကြီးသောင်လမ်းပေါ်ရှိ မယ်လေးရိုး တံတား ၁၄၀ ပေ တည်ဆောက်ခြင်းလုပ်ငန်းများအား သွားရောက်ကြည့်ရှုစစ်ဆေးခဲ့ပြီး တာဝန်ရှိသူများက ရှင်းလင်း တင်ပြရာ တိုင်းဒေသကြီးဝန်ကြီးချုပ်က တံတားများသည် ဒေသတွင်း ကျေးရွာများအကြား ဆက်သွယ်သွားလာရေး၊ ကုန်စည်စီးဆင်းရေးနှင့် ဒေသဖွံ့ဖြိုးတိုးတက်ရေး တို့အတွက် အရေးပါသည့် အခြေခံအဆောက်အအုံများဖြစ်သဖြင့် သတ်မှတ်စံချိန်စံညွှန်းများနှင့်အညီ အရည်အသွေး ပြည့်မီခိုင်ခံ့စွာ တည်ဆောက်ရန်၊ လုပ်ငန်းများကို သတ်မှတ်ကာလအတွင်း အချိန်မီ ပြီးစီးနိုင်ရေး စီမံဆောင်ရွက်ရန်၊ တည်ဆောက်ရေးလုပ်ငန်းအဆင့်ဆင့်ကို စနစ်တကျ ကြီးကြပ် စစ်ဆေးရန်နှင့် ရေရှည်အသုံးပြုနိုင်ရေးအတွက် လုပ်ငန်းခွင်အရည်အသွေးကို အလေးထား ဆောင်ရွက်ကြရန် မှာကြားခဲ့သည်။

ဧရာဝတီတိုင်းဒေသကြီးဝန်ကြီးချုပ် ဦးအေးကျော် သည် ဖျာပုံမြို့နယ်၊ သပြေကန်သိမ်ကုန်းဧရိယာအတွင်း နွေစပါးစိုက်ပျိုးရေလုံလောက်စွာ တိုးတက်ပေးဝေနိုင်ရေး ဆောင်ရွက်ထားရှိမှု အခြေအနေများကို လည်းကောင်း၊ ကြက်ဖမွေးဇောင်းကျွန်းပတ်တာ တာမိုင် ၃/၂ မှ ၉/၂ အတွင်း တာပုံစံကျ တာမြှင့်ခြင်းလုပ်ငန်း ဆောင်ရွက်နေမှုများကိုလည်းကောင်း၊ ကြက်ဖမွေးဇောင်း ကျွန်းပတ်တာ အတွင်းမှ ရေချိုကိုသွင်းယူ၍ ဘိုကလေးမြို့နယ်၊ ဒေါင့်ကြီးအရှေ့ကျွန်းပတ်တာအတွင်း နွေသီးထပ် ၂၂၀၀ ဧက တိုးချဲ့စိုက်ပျိုးနိုင်ရေး စပေတူးမြောင်း တူးဖော်နေမှုများကိုလည်းကောင်း၊ ကြက်ဖ မွေးဇောင်း ကျွန်းပတ်တာ နွေစပါးစိုက်ဧက (၁၂၅၀) ဧကအား အကျိုးပြုမည့် အချင်း ၄ ပေ အရွယ်အစား ၁၅ ပေါက်ပါ ဖလက်ရေထိန်းတံခါး ပြုပြင်ဆောင်ရွက်နေမှုများကိုလည်းကောင်း သွားရောက်ကြည့်ရှုစစ်ဆေးခဲ့ပြီး လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ပါသည်။