ဧရာဝတီတိုင်းဒေသကြီး၊ မြောင်းမြမြို့ပညာရေးဒီဂရီကောလိပ်၊ မြရတုခန်းမ၌ လုပ်ငန်းခွင်အကြို မူလတန်းဆရာအတတ်ပညာသင်တန်း PPTT(၁၀/၂၀၂၃)နှင့် ပညာရေးဘွဲ့ (ပထမနှစ်) ကျောင်းသား၊ ကျောင်းသူများ၏ မောင်မယ်သစ်လွင်ကြိုဆိုပွဲ အခမ်းအနားကို ယနေ့နံနက်ပိုင်း ကပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ ပညာရေးကောလိပ်မှ ဆရာ၊ ဆရာမများနှင့် သင်တန်းသား၊ သင်တန်းသူများ တက်ရောက်ခဲ့ကြသည်။ ရှေးဦးစွာ အခမ်းအနားအား သင်တန်းသား၊ သင်တန်းသူများက “ ပွင့်ဖူးဝေဆာ ကျောင်းတော်သာ”သီချင်းဖြင့်ဖွင့်လှစ်ခဲ့ပြီးနောက် တိုင်းဒေသကြီးဝန်ကြီးချုပ်က“တိုင်းဒေသ ကြီးသည် ကျောင်းတက်ရောက်မှု၊ ကျောင်းဖွင့်လှစ်မှု၊ အတန်းစဉ်ကူးပြောင်းမှုနှင့် အောင်ချက် မြင့်မားသော တိုင်းဒေသကြီးဖြစ်ပါကြောင်း၊ တိုင်းဒေသကြီးတွင် အခြေခံပညာကျောင်း၊ ကိုယ်ပိုင်ကျောင်း၊ ဘုန်းတော်ကြီးသင်ကျောင်းများအပါအဝင် ကျောင်းပေါင်း (၇၂၀၀)ကျော် ဖွင့်လှစ်ထားရှိပြီး ကျောင်းတက်ရောက်မှု (၁၁)သိန်းနှစ်သောင်းကျော်နှင့် ဆရာဆရာမအင်အား ပေါင်း (၅)သောင်းကျော်ရှိပါကြောင်း၊ တိုင်းဒေသကြီးသည် ရေခံမြေခံကောင်းမွန်ပြီး ပညာရေး ကဏ္ဍတိုးတက် မြင့်မားကာ လူ့စွမ်းအားအရင်းအမြစ်များစွာ မွေးထုတ်ရာ တိုင်းဒေသကြီးလည်း ဖြစ်ပါကြောင်း၊ ယခုနှစ်သည် ပညာရေးစနစ်သစ် KGတန်းမှ Grade-12 အထိ အတန်းစုံ တက်ရောက်သည့် နှစ်လည်းဖြစ်ပါကြောင်း၊ Grade-12 တက္ကသိုလ်ဝင်စာမေးပွဲတွင် အောင်ချက် မြင့်မားရေးအတွက် ဘာသာရပ်ဆိုင်ရာ သိကောင်းစရာ ဆွေးနွေးဟောပြောပွဲများအား တက္ကသိုလ်များမှ ပါမောက္ခချုပ်များ၊ ပါမောက္ခဌာနမှူးများ၊ ကထိကများနှင့် အခြေခံပညာ အထက်တန်းကျောင်းများမှ ဆရာ၊ ဆရာမများပူးပေါင်း၍ ပုသိမ်တက္ကသိုလ်၊ ဟင်္သာတတက္ကသိုလ်နှင့် မအူပင်တက္ကသိုလ်တို့တွင် ဇုန်ကြီး(၃)ဇုန်ခွဲ၍ ပြုလုပ်ခဲ့ပါကြောင်း၊ ဆရာ၊ ဆရာမများအနေဖြင့် မိမိ၏ တပည့်များအား မတတ်သည်များကိုတတ်အောင်၊  မသိသည်များကို သိအောင်၊ နားမလည် သည်များကို နားလည်အောင် သွန်သင်ဆုံးမကြသူများ ဖြစ်ပါကြောင်း၊ ဆရာ၊ ဆရာမများအနေဖြင့် မိမိတို့တာဝန်ကျရာဒေသ ကျောင်းများသို့ ရောက်ရှိတာဝန် ထမ်းဆောင်သည့်အခါ ကျောင်းနေအရွယ်ကလေးတိုင်း ကျောင်းတက်ရောက်နိုင်ရေး၊ အတန်းစဉ် ကူးပြောင်းမှုမြင့်မားရေးနှင့် အနည်းဆုံး KG+9 ပြီးမြောက်စေရေးအတွက် ဝိုင်းဝန်းကြိုးပမ်း ဆောင်ရွက်ပေးကြစေလိုကြောင်း၊ ဆရာ၊ ဆရာမများအနေဖြင့် နိုင်ငံ့တာဝန်များကို ပုခုံးပြောင်း ထမ်းဆောင်မည့် လူငယ်များကို ဗလငါးတန်နှင့်ပြည့်စုံသော လူငယ်များဖြစ်ရန်အတွက် ပြုစုပျိုးထောင်ပေးရမှာဖြစ်ပါကြောင်း၊ ခေတ်မီဖွံ့ဖြိုးတိုးတက်သော နိုင်ငံတော်ကို တည်ဆောက်ရာတွင် ပညာရေးဖြင့်ရင်းနှီးမြှုပ်နှံရမှာဖြစ်ပါကြောင်းနှင့် ဆရာ၊ ဆရာမများ၏ အခန်းကဏ္ဍကိုလည်း မြှင့်တင်ရမည်ဖြစ်ပါကြောင်း၊ ဆရာများ၏ အရည်အသွေးများ မြင့်မား လာပါက တပည့်များ၏ သင်ယူမှုစွမ်းရည်များသည်လည်း တိုးတက်လာမည်ဖြစ်ပါကြောင်း၊ ဆရာ၊ ဆရာများသည်  ကျောင်းသား၊ ကျောင်းသူများ၏ စံနမူပြများ ဖြစ်ရန်လိုအပ်ပါကြောင်း၊ ပညာရေးကဏ္ဍအတွက် အားထားရသည့် ဆရာ၊ ဆရာမများဖြစ်လာမည့် သင်တန်းသား၊ သင်တန်းသူများအတွက် များစွာဂုဏ်ယူပါကြောင်းနှင့် နိုင်ငံတော်အတွက် အားထားရသည့် လူတော်လူကောင်းများ မွေးထုတ်ပေးနိုင်သည့် ဆရာ၊ ဆရာမများဖြစ်ကြပါစေကြောင်း" ကြိုဆို နှုတ်ခွန်းဆက်စကားပြောကြားသည်။ ဆက်လက်၍ မြို့နယ်အလိုက် သင်တန်းသား၊ သင်တန်းသူများက တိုင်းဒေသကြီး ဝန်ကြီးချုပ်အား မိတ်ဆက်ခဲ့ကြပြီး တိုင်းဒေသကြီးဝန်ကြီးချုပ်က သင်တန်းသား၊ သင်တန်းသူ များအတွက် ထောက်ပံ့ငွေများကိုပေးအပ်ရာ မြောင်းမြပညာရေးဒီဂရီကောလိပ်မှ ကျောင်းအုပ် ကြီးက လက်ခံရယူခဲ့သည်။ ထို့နောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် သင်တန်းသား၊ သင်တန်းသူများနှင့်အတူ ရင်းနှီးနွေးထွေးစွာ နေ့လယ်စာအတူတကွ သုံးဆောင် ခဲ့သည်။ မြောင်းမြပညာရေးဒီဂရီကောလိပ်၌ ၂၀၂၃-၂၀၂၄ ပညာသင်နှစ်၊ လုပ်ငန်းခွင်အကြို မူလတန်းဆရာအတတ်ပညာသင်တန်း PPTT (၁၀/၂၀၂၃)သင်တန်းတွင် သင်တန်းသား၊ သင်တန်းသူပေါင်း (၃၀၃)ဦးနှင့်၊ ပညာရေးဘွဲ့ (ပထမနှစ်)တွင် သင်တန်းသား၊ သင်တန်းသူပေါင်း (၁၂၃)ဦးတက်ရောက်လျှက်ရှိပါသည်။ ဆက်လက်၍ ဝန်ကြီးချုပ်နှင့်အဖွဲ့သည် မြောင်းမြမြို့နယ်၊ မုဆိုးကွင်းကျေးရွာသို့ သွားရောက်၍ သစ်စိမ်းမြေသြဇာ ပိုက်ဆံလျှော်(မျိုးစေ့ထုတ်)ရန်အတွက် ကျေးရွာစုပေါင်း စိုက်ခင်း ဧက(၅၀)တွင် သစ်စိမ်းမြေသြဇာ ပိုက်ဆံလျှော်မျိုးစေ့များ ထွန်ယက်မြှုပ်နှံနေမှုများ ကိုလည်းကောင်း၊  မြောင်းမြမြို့နယ်၊ ကံကြီးကျေးရွာရှိ တောင်သူဦးမိုးဝင်း၏  ဆီထွက်သီးနှံ နှမ်းမျိုးသန့်စိုက်ခင်းနှင့် မြေပဲမျိုးသန့်စိုက်ခင်းတွင် ဆီထွက်သီးနှံ နှမ်းနှင့်မြေပဲ မျိုးစေ့ချ စိုက်ပျိုးနေမှုများကို လည်းကောင်း၊ အိမ်မဲမြို့နယ်၊ ကျုံကနိကျေးရွာသို့ သွားရောက်၍ တောင်သူ ဦးအုန်းမြင့်၏ စိုက်ဧက(၃)ဧကတွင် ပြုလုပ်သည့် ၂၀၂၃ ခုနှစ်၊ ဆောင်းသီးနှံ(နေကြာ) ဆင်းရွှေကြာ-၂ နေကြာမျိုးအား မျိုးစေ့ချစိုက်ပျိုးနေမှုအားလည်းကောင်း၊ ဝါးခယ်မြို့နယ်၊ ကျွန်းကုန်းကျေးရွာ အုပ်စု၊ တောင်သူဦးဝင်းသိန်း၏ စိုက်ဧက(၅)တွင် ပြုလုပ်သည့် ဆင်းရွှေကြာ -၂ နေကြာမျ်ုးရွေးချယ်မြှင့်တင်ရေးစံပြကွက်တွင် မျိုးစေ့ချစိုက်ပျိုးနေမှုအားလည်းကောင်း ကြည့်ရှု အားပေးခဲ့သည်။ ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ကျုံပျော်ခရိုင်၊ ကျောင်းကုန်း မြို့နယ်၊ ကျုံတာကျေးရွာနှင့် မြောင်းမြခရိုင်၊ အိမ်မဲမြို့နယ် သရွတ်ကြီးကျေးရွာသို့ ဆက်သွယ် ထားသည့် ခွဲကျောက်အမာခံခင်းခြင်း လုပ်ငန်းများအားကြည့်ရှုစစ်ဆေးရာ ကျေးလက်လမ်း ဖွံ့ဖြိုးရေးဦးစီးဌာန၊ ခရိုင်ဦးစီးမှူးက ၂၀၂၃-၂၀၂၄ ဘဏ္ဍာနှစ်တွင်  ဆောင်ရွက်သည့် ကန်ကြီးထောင့်မြို့နယ်၊ ဘုရားကုန်း-ဝဲချောင်းလမ်း (၁/၂.၆၄)မိုင်ကျောက်ခင်းခြင်းလုပ်ငန်း ဆောင်ရွက် နေမှု၊ ကျောင်းကုန်းမြို့နယ်၊ ဆိပ်သာ-လေးအိမ်လမ်းပေါ်ရှိ (၄၀) ပေ၊ (၂၀)ပေ ကွန်ကရစ်တံတား ပထမပိုင်းဆောင်ရွက်နေမှုနှင့် ကျောက်ခင်းလမ်း (၁) မိုင် ဆောင်ရွက်နေမှု၊ ကျုံတာ-သရွတ်ကြီး လမ်းပေါ်ရှိ (၁၀၀) ပေ၊ (၂၀) ပေ ကွန်ကရစ်တံတား ပထမပိုင်းဆောင်ရွက်နေများနှင့် ကျောက်ခင်းလမ်း (၁)မိုင် လုပ်ငန်းဆောင်ရွက်နေမှုများကို ရှင်းလင်းတင်ပြခဲ့ပြီး တိုင်းဒေသကြီး ဝန်ကြီးချုပ်က သတ်မှတ်ထားသည့် ဘဏ္ဍာနှစ်အတွင်း လုပ်ငန်းများအချိန်မီပြီးစီးစေရေးနှင့် အရည်အသွေးပြည့်မီရေး အလေးထားဆောင်ရွက်ရန် လမ်းညွှန်မှာကြားခဲ့ပြီး လုပ်ငန်းဆောင်ရွက်နေမှုများအား လိုက်လံကြည့်ရှုစစ်ဆေးခဲ့သည်။

ဧရာဝတီတိုင်းဒေသကြီး ချင်းအမျိုးသားစာပေနှင့်ယဉ်ကျေးမှုအသင်းမှ ကြီးမှူးကျင်းပသော အရှိုချင်းရိုးရာကောက်သစ်စားပွဲတော်နှင့် သက်ကြီးဘိုးဘွား ပူဇော်ကန်တော့ပွဲအခမ်းအနားကို ယနေ့နံနက်ပိုင်းက အင်္ဂပူမြို့နယ်အားကစားနှင့်ကာယပညာဦးစီးဌာန၊ မြို့နယ်အားကစားခန်းမ၌ ပြုလုပ်ရာ အခမ်းအနားသို့ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့်ဇနီး၊ အစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ ဌာနဆိုင်ရာများ၊ ချင်းတိုင်းရင်းသား၊ တိုင်းရင်းသူများတက်ရောက်ခဲ့ကြသည်။ ဦးစွာ သဘာပတိက မင်္ဂလာမောင်းသုံးချက်တီး၍ အခမ်းအနားကိုဖွင့်လှစ်ပေးပြီးနောက် ချင်းရိုးရာပဆန်းဆရာက ရိုးရာမပျက် ပဆန်းဖွယ်ခြင်းကို ဆောင်ရွက်ခဲ့ပြီးနောက် သဘာပတိက မိန့်ခွန်းပြောကြားသည်။ ထို့နောက် တိုင်းဒေသကြီး ဝန်ကြီးချုပ်က“ ချင်းတိုင်းရင်းသားများ အများစုမှီတင်းနေထိုင်ကြသည့် ကြံခင်း၊ မြန်အောင်၊ အင်္ဂပူမြို့နယ်များကိုအခြေခံပြီး အရှိုချင်းရိုးရာကောက်သစ်စားပွဲတော်နှင့် သက်ကြီးဘိုးဘွားပူဇော်ကန်တော့ပွဲကို အင်္ဂပူမြို့၌ ရိုးရာအစဉ်လာမပျက် ကျင်းပခြင်းဖြစ်ပါကြောင်း၊ ယခုကဲ့သို့ကျင်းပဆောင်ရွက်နိုင်ခြင်းသည် တိုင်းဒေသကြီး၏ တည်ငြိမ်အေးချမ်းမှုရှိခြင်းနှင့် နယ်မြေဒေသ၏ စိုက်ပျိုးရေးဖြစ်ထွန်း အောင်မြင်မှုများကြောင့်လည်း ဖြစ်ပါကြောင်း၊ မိမိအနေဖြင့် ဒေသအသီးသီးသို့ သွားရောက်တာဝန်ထမ်းဆောင်ခဲ့သည့် အခါတွင်လည်း ​ဒေသခံတိုင်းရင်းသားတို့၏ ကောင်းမွန်သည့်ယဉ်ကျေးမှုအစဉ်အလာ၊ ဓလေ့စရိုက်များကိုလည်း များစွာလေ့လာသိရရှိခဲ့ရပါကြောင်း၊ မိမိတို့ဧရာဝတီတိုင်းဒေသကြီးသည် တိုင်းရင်းသား လူမျိုးပေါင်းစုံမှီတင်းနေထိုင်သည့် တိုင်းဒေသကြီးဖြစ်ပါကြောင်း၊ တိုင်း​ဒေသကြီးအစိုးရအဖွဲ့အ​နေဖြင့် တိုင်း​ဒေသကြီးအတွင်းမှီတင်​နေထိုင်ကြသည့် တိုင်းရင်းသားများ၏ တိုင်းရင်းသားစာ​ပေသင်ကြား​ရေး၊ တိုင်းရင်းသားရိုးရာဓ​လေ့ပွဲ​တော်များ၊ ​နေ့ထူး​နေ့မြတ်များနှင့် တိုင်းရင်းသား​ရေးရာကိစ္စရပ်များအား အစဥ်အလာမပြတ် ကျင်းပနိုင်​စေ​ရေး ​ဆောင်ရွက်​ပေးလျှက်ရှိပါ​ကြောင်း၊ မြန်အောင်ခရိုင်သည် စိုက်ပျိုးရေးဖြစ်ထွန်းအောင်မြင်သကဲ့သို့ ဆီထွက်သီးနှံစိုက်ပျိုးမှုသည်လည်း စံထားရသည့်ခရိုင်တစ်ခုဖြစ်ပါကြောင်းနှင့် ယခုကဲ့သို့ဖြစ်ထွန်းအောင်မြင်မှုများသည် ​ဒေသခံတိုင်းရင်းသားများအားလုံးက တက်ညီလက်ညီ ပူးပေါင်းပါဝင်စိုက်ပျိုးခြင်းကြောင့်ဖြစ်ပါကြောင်း၊ နိုင်ငံတော်အစိုးရ၏ ရှေ့လုပ်ငန်းစဉ်(၅)ရပ်၊ ဦးတည်ချက်(၉)ရပ်ကိုလည်း အကောင်အထည်ဖော်ဆောင်ရွက်လျက်ရှိပါကြောင်း၊ တိုင်း​ဒေသကြီးအစိုးရအဖွဲ့​အ​နေဖြင့် ကျေးလက်​နေပြည်သူများ၏ လူမှုစီးပွားဘဝဖွံ့ဖြိုးတိုးတက်​ရေးအတွက် ဆောင်ရွက်လျက်ရှိရာ ဌာနဆိုင်ရာများ၊ တိုင်းရင်းသားပြည်သူများကလည်း တက်ညီလက်ညီ ပူးပေါင်းပါဝင်ဆောင်ရွက်ပေးကြစေလိုကြောင်း” နှုတ်ခွန်းဆက်အမှာစကားပြောကြားသည်။ ဆက်လက်၍ အနောက်တောင်တိုင်းစစ်ဌာနချုပ်တိုင်းမှူးက နှုတ်ခွန်းဆက်စကားပြောကြားပြီး ဧရာဝတီတိုင်းဒေသကြီး ချင်းအမျိုးသားစာပေနှင့်ယဉ်ကျေးမှုအသင်း ဥက္ကဋ္ဌက အရှိုချင်းရိုးရာကောက်သစ်စားပွဲတော် ကျင်းပရသည့်ရည်ရွယ်ချက်များအား ရှင်းလင်းတင်ပြသည်။ ထို့နောက် သက်ကြီးဘိုးဘွားများအား တိုင်းဒေသကြီး ဝန်ကြီးချုပ်နှင့်ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့် ဇနီး၊ တိုင်းရင်းသားရေးရာဝန်ကြီးတို့က ကန်တော့ငွေများပေးအပ်ခဲ့ပြီး ဧရာဝတီတိုင်းဒေသကြီး ချင်းအမျိုးသားစာပေနှင့်ယဉ်ကျေးမှုအသင်း အတွင်းရေးမှူးက ကျေးဇူးတင်စကားများပြောကြားသည်။ ဆက်လက်၍  တိုင်းဒေသကြီးဝန်ကြီးချုပ်နှင့် ဧည့်သည်တော်များသည် ဧရာဝတီတိုင်းဒေသကြီး ချင်းအမျိုးသားစာပေနှင့်ယဉ်ကျေးမှုအသင်းက ချင်းရိုးရာဝါးညှပ်အက၊ ယိမ်းအကများဖြင့် ဖျော်ဖြေတင်ဆက်မှုများကို ကြည့်ရှုအားပေးကာ တိုင်းဒေသကြီးဝန်ကြီးချုပ်နှင့် ဇနီး၊ တိုင်းမှူးနှင့် ဇနီး၊ တိုင်းရင်းသားရေးရာဝန်ကြီးတို့က ဂုဏ်ပြုချီးမြှင့်ငွေများ ပေးအပ်ခဲ့သည်။  ထို့​နောက် အရှိုချင်းရိုးရာ​ကောက်သစ်စားပွဲ​တော် မိတ်ဆုံစားပွဲကို ဆက်လက်ကျင်းပရာ တိုင်း​ဒေသကြီးဝန်ကြီးချုပ်နှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့်ဇနီးနှင့် တာဝန်ရှိသူများက ​ဒေသခံချင်းတိုင်းရင်းသားများနှင့် ချစ်ကြည်ရင်းနှီးစွာ ​နေ့လယ်စာ အတူတကွသုံး​ဆောင်ခဲ့ကြပါသည်။ ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် အင်္ဂပူမြို့နယ်၊ အောက်ရွာကြီးကျေးရွာအုပ်စုရှိ တောင်သူဦးရာဇာအောင်၏ လယ်​မြေ၌ပြုလုပ်သည့် နေကြာမျိုးစေ့ထုတ်စိုက်ခင်းအား ဆင်းရွှေကြာ(၂)နေကြာမျိုးစေ့ချ စိုက်ပျိုးနေမှုအားကြည့်ရှုအားပေးပြီး ဖြစ်ထွန်း​အောင်မြင်​​အောင်စိုက်ပျိုးရန်နှင့် ​နေကြာမျိုး​စေ့ ရွေးထုတ်မှုများကို မှတ်တမ်းထားရှိရန် လမ်းညွှန်မှာကြားခဲ့သည်။ ထို့နောက် အင်္ဂပူမြို့နယ်၊ ရွှေ​ညောင်ပင်ကျေးရွာသို့ သွားရောက်၍ တောင်သူဦးတက်တိုး၏ ပန်းဂေါ်ဖီ၊ ငရုတ်၊ ခရမ်း၊ ​ပြောင်း၊ သခွား၊ ကွမ်း၊ ဂန္ဓမာ၊ နှင်းပန်း စိုက်ခင်းများ ဖြစ်ထွန်း​နေမှုကို ကြည့်ရှအား​ပေးခဲ့ပြီး ​စျေးသို့တင်ပို့​​ရောင်းချရမှု၊ ဝင်​ငွေရရှိမှုများအား ​မေးမြန်းခဲ့ပါသည်။ ဆက်လက်၍ အင်္ဂပူမြို့နယ်၊ ကျေးလက်လမ်းဖွံ့ဖြိုးရေးဦးစီးဌာနမှ ၂၀၂၃-၂၀၂၄ဘဏ္ဍာရေးနှစ်၊ တိုင်းဒေသကြီး ငွေလုံးငွေရင်းရန်ပုံငွေဖြင့် ဆောင်ရွက်သည့် ပဆင-ရွှေတောင်စု-ကညင်ဆိပ်လမ်း (၀မိုင် ၇. ၃၁၈ဖာလုံ) ကျောက်ချောခင်းခြင်းလုပ်ငန်းအား ကြည့်ရှုစစ်ဆေးရာ ကျေးလက်လမ်းဖွံ့ဖြိုးရေးဦးစီးဌာန၊ တိုင်းဦးစီးမှူးက လုပ်ငန်းဆောင်ရွက်ပြီးစီးမှုအ​ခြေအ​နေများကို ရှင်းလင်းတင်ပြခဲ့ပါသည်။ ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် ​ရွှေ​တောင်စု​ကျေးရွာတွင် ၂၀၂၃-၂၀၂၄ ဘဏ္ဍာနှစ် တိုင်း​ဒေသကြီးရန်ပုံ​ငွေဖြင့်​ဆောင်ရွက်သည့် ကွန်ကရစ် ဘီးလမ်းခင်းခြင်းလုပ်ငန်းအား ကြည့်ရှုစစ်​ဆေးရာ တိုင်း​ဒေသကြီး​ကျေးလက်​ဒေဖွံ့ဖြိုးတိုးတက်​ရေးဦးစီးဌာန၊ ဒုတိယညွှန်ကြား​ရေးမှူးက လုပ်ငန်း​ဆောင်ရွက်ပြီးစီးမှုများအား ရှင်းလင်းတင်ပြခဲ့ပါသည်။ ထို့​​နောက် တိုင်း​ဒေသကြီးဝန်ကြီးချုပ်နှင့် တာဝန်ရှိသူများက ကွန်ကရစ်လမ်းအား ​​မော်တော်ယာဥ်များဖြင့် လှည့်လည်ကြည့်ရှုစစ်​ဆေးခဲ့ပါသည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ဟင်္သာတခရိုင်၊ လေးမျက်နှာမြို့နယ်၊ ပန်းတောကြီးကျေးရွာရှိ တောင်သူ ဦး​ရွှေဝင်း​မောင်၏ လယ်​မြေ(၂)ဧက၌ပြုလုပ်သည့် ၂၀၂၃-၂၀၂၄ခုနှစ်၊ သစ်စိမ်းမြေဩဇာ(ပိုက်ဆံလျှော်)မျိုးစေ့ထုတ်အတွက် မျိုးစေ့ပေးအပ်ပွဲနှင့် ထွန်ယက်စိုက်ပျိုးပွဲသို့ တက်ရောက်၍ တောင်သူများထံသို့ မျိုးစေ့များပေးအပ်ခဲ့ပြီး ပိုက်ဆံလျှော်စုပေါင်းထွန်ယက်စိုက်ပျိုးနေမှုများကို ကြည့်ရှုအားပေးခဲ့သည်။

ဧရာဝတီတိုင်းဒေသကြီးအစိုးရအဖွဲ့ကကြီးမှူး၍ မြန်မာ့ရိုးရာယဉ်ကျေးမှုအစဉ်အလာနှင့်အညီ ရှင်ဥပဂုတ္တရဟန္တာမထေရ်မြတ်ကြီးအား ဆီမီးမျှောပူဇော်ပွဲအား ယ‌နေ့ညနေပိုင်းက ပုသိမ်မြို့၊ ကမ်းနားလမ်းရှိ ရေဆင်းတန်ဆောင်း၌ပြုလုပ်ရာ တိုင်းဒေသကြီးဝန်ကြီးချုပ်နှင့်ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့်ဇနီးများ၊ တိုင်း၊ ခရိုင်၊ မြို့နယ်ဌာနဆိုင်ရာများ၊ ပုသိမ်မြို့ပေါ်ရှိပြည်သူများတက်ရောက်ခဲ့ကြသည်။ ဦးစွာ အခမ်းအနားအား "နမောတဿ" သုံးကြိမ်ရွတ်ဆို ဘုရားကန်တော့၍ဖွင့်လှစ်ခဲ့ပြီး နိုင်ငံတော်ဩဝါဒါစရိယ၊ ပုသိမ်မြို့၊ နိဂြောဓာရုံ ညောင်ပင်သာပရိယတ္တိစာသင်တိုက်၏ ပဓာနနာယဆရာတော် ဘဒ္ဒန္တဝိဿုတ (အဘိဓဇမဟာရဋ္ဌဂုရု၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) မဟာထေရ်မြတ်ထံမှ ဝန်ကြီးချုပ်နှင့်ဧည့်ပရိသတ်များက ငါးပါးသီလခံယူဆောက်တည်၍ ဆရာတော် သံဃာတော်အရှင်သူမြတ်များ ရွတ်ပွားသရဇ္ဈာယ်ချီးမြှင့်တော်မူအပ်သော ပရိတ်တရားတော်များကို နာယူကြည်ညိုပြီး တိုင်းဒေသကြီးဝန်ကြီးချုပ်နှင့် ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့်ဇနီးများက ဆရာတော်သံဃာတော် အရှင်သူမြတ်မျာအား လှူဖွယ်ဝတ္ထုပစ္စည်းများနှင့် နဝကမ္မအလှူငွေများ ဆက်ကပ်လှူဒါန်းခဲ့သည်။ ယင်းနောက် တိုင်းဒေသကြီးသံဃနာယကအဖွဲ့၊ ဩဝါဒါစရိယ ပုသိမ်မြို့၊ မရမ်းချို ကျောင်းတိုက်၏ ပဓာနနာယကဆရာတော် ဘဒ္ဒန္တသောဘိတ (အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) မဟာထေရ်မြတ်ထံမှ လှူဒါန်းမှုအစုစုတို့အတွက် အနုမောဒနာတရား နာကြား၍ ရေစက်သွန်းချ အမျှပေးဝေခဲ့ကာ "ဗုဒ္ဓသာသနံ စိရံ တိဋ္ဌတု" သုံးကြိမ်ရွတ်ဆိုဆုတောင်း၍ အခမ်းအနားကို ရုပ်သိမ်းခဲ့ပါသည်။ ထို့​နောက် တိုင်းဒေသကြီးဝန်ကြီးချုပ်နှင့်တာဝန်ရှိသူများက ရှင်ဥပဂုတ္တရဟန္တာမထေရ်မြတ်ကြီးအား ပင့်ဆောင်ခြင်းနှင့် နဂါးစာကျွေးခြင်းများကို ဆောင်ရွက်ခဲ့သည်။ ဆက်လက်၍ တိုင်း​ဒေသကြီးအစိုးရအဖွဲ့မှကြီးမှူးကျင်းပ​သော တန်​ဆောင်တိုင်ဆီမီး​မျှောပူ​ဇော်ပွဲနှင့် နိဗ္ဗာန်​စျေးပွဲ​တော် ဖွင့်ပွဲအခမ်းအနားအား ဆက်လက်ပြုလုပ်ရာ တိုင်းဒေသကြီးဝန်ကြီးချုပ်၊ အနောက်တောင်တိုင်းစစ်ဌာနချုပ်တိုင်းမှူးနှင့် လုံခြုံရေးနှင့်နယ်စပ်ရေးရာဝန်ကြီးတို့က အခမ်းအနားအား ဖဲကြိုးဖြတ်ဖွင့်လှစ်ပေးခဲ့ပါသည်။ ထို့​နောက် တိုင်း​ဒေသကြီးဝန်ကြီးချုပ်နှင့်အဖွဲ့သည် ဌာနဆိုင်ရာများ၊ မြို့​ပေါ်ရပ်ကွက်​နေပြည်သူများ၏ နိဗ္ဗာန်ဈေးဖွင့်လှစ်၍ စတုဒီသာကျွေးမွေးနေမှုများအားလည်းကောင်း၊ ရှင်ဥပဂုတ္တရဟန္တာမထေရ်မြတ်ကြီးအား ဆီမီး(၁၀၀၀၀)ဖြင့် ငဝန်မြစ်အတွင်းဆီမီးမျှောပူဇော်ခြင်းတို့အားလည်းကောင်း ကြည့်ရှုအားပေးခဲ့ပြီး တိုင်း​ဒေသကြီးဝန်ကြီးချုပ်နှင့်အဖွဲ့က ငဝန်မြစ်အတွင်း ဆီမီးမျှောပူဇော်ခဲ့ကြပါသည်။ ထို့​နောက် တိုင်း​ဒေသကြီးဝန်ကြီးချုပ်နှင့်အဖွဲ့သည် ပုသိမ်မြို့ ကမ်းနားလမ်းတစ်​လျှောက်တွင် ပြည်သူများပျော်ရွှင်စွာ လာ​ရောက်လည်ပတ်​နေမှုများနှင့် ကမ်းနားလမ်း ရှုခင်းအလှများအား ​​ရေယာဥ်ဖြင့် လှည့်လည်ကြည့်ရှုခဲ့ပါသည်။ တန်ဆောင်မုန်းလပြည့်နေ့ညတွင် ဌာနဆိုင်ရာများနှင့် မြို့​ပေါ်ရပ်ကွက်များမှပြည်သူများစု​ပေါင်း၍ နိဗ္ဗာန်​စျေး စတုဒီသာမဏ္ဍပ်(၈၀)ဖြင့် ​စား​သောက်ဖွယ်ရာများ ကျွေး​မွေးလှူဒါန်းခဲ့ကြပြီး လာရောက်လည်ပတ်သည့်ပြည်သူများ အေးချမ်းပျော်ရွှင်စွာ စိတ်အပန်းဖြေနိုင်ရန်အတွက် စတိတ်ရှိုးတေးသီချင်းများဖြင့် သီဆိုဖျော်ဖြေခြင်း၊ ဆင်အက၊ မြန်မာ့ရိုးရာအိုးစည်အက၊ ရှမ်းရိုးရာအိုးစည်အကများဖြင့်ဖျော်ဖြေခြင်း၊ မီးပုံးများအား ဌာနဆိုင်ရာများနှင့်ပြည်သူများအတူတကွစု​ပေါင်း၍​ပျော်ရွှင်စွာလွှတ်တင်ခြင်း၊ မီးရှူးမီးပန်းများ ပစ်ဖောက်ခြင်းများကို စည်ကားသိုက်မြိုက်​ပျော်ရွှင်စွာ ဆောင်ရွက်ခဲ့ကြပါသည်။

ဧရာဝတီတိုင်း​ဒေသကြီး၊ ပုသိမ်မြို့ကျက်သ​ရေ​ဆောင် ရွှေမုဋ္ဌောမဟာစေတီတော်မြတ်ကြီး၏ (၃၆)ကြိမ်မြောက် မသိုးသင်္ကန်းရက်ခတ် ယှဉ်ပြိုင်ပွဲအခမ်းအနားအား နိုဝင်ဘာ ၂၆ ရက်​နေ့ ညနေပိုင်းက ပုသိမ်မြို၏ ကျက်သရေဆောင် ရှေးဟောင်းသမိုင်းဝင် ရွှေမုဋ္ဌောမဟာစေတီတော်မြတ်ကြီး၏ရင်ပြင်တော်ပေါ်၌ပြုလုပ်ရာ တိုင်းဒေသကြီးဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူး နှင့်ဇနီး၊ ပုသိမ်​လေတပ်စခန်းဌာနချုပ်မှူးနှင့်ဇနီး၊ အစိုးရအဖွဲ့ဝင် ဝန်ကြီးများနှင့်၎င်းတို့၏ဇနီးများ၊ တိုင်း၊ ခရိုင်၊ မြို့နယ်ဌာနဆိုင်ရာဝန်ထမ်းများ၊ ဘဏ္ဍာတော်ထိန်းဂေါပကအဖွဲ့နှင့် မသိုးသင်္ကန်း ရက်ခတ်ယှဉ်ပြိုင်မည့် ရက်ကန်းပညာရှင် ပြိုင်ပွဲဝင်များတက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်သည် ရွှေမုဋ္ဌောမဟာစေတီတော်မြတ်ကြီး၏ ဦးမောင်ကြီးတန်ဆောင်းတွင် ပန်း၊ ရေချမ်း၊ ဆီမီးများကပ်လှူပူဇော်ပူဇော်ကာ ရွှေမုဋ္ဌောမဟာစေတီတော်မြတ်ကြီးအား ဖူးမျှော်ကြည်ညို၍ မသိုးသင်္ကန်းယှဉ်ပြိုင်ရက်ခတ်မည့် ယာယီမဏ္ဍပ်သို့ ရောက်ရှိပြီးနောက် ရွှေမုဋ္ဌောမဟာစေတီတော် မြတ်ကြီး၊ ဘဏ္ဍာတော်ထိန်းဂေါပကအဖွဲ့မှ အလှည့်ကျသဘာပတိက မသိုးသင်္ကန်းဆိုင်ရာများနှင့် ပတ်သက်၍ ဆောင်ရွက်ထားရှိမှုများအား ရှင်းလင်းတင်ပြသည်။ ဆက်လက်၍ ယှဉ်ပြိုင်ရက်ခတ်ကြမည့် ရက်ကန်းပညာရှင်များက သတ်မှတ်စင်တော်များ၌နေရာယူကြကာ မသိုးသင်္ကန်းရက်ကန်းပြိုင်ပွဲအမှတ်ပေးစည်းမျဉ်းများအား ဒိုင်အဖွဲ့ဝင်တစ်ဦးက ရှင်းလင်းတင်ပြပြီးနောက် တိုင်းဒေသကြီး ဝန်ကြီးချုပ်က မင်္ဂလာအချိန်တွင် မင်္ဂလာအောင်မောင်း တီး၍ ပြိုင်ပွဲကိုဖွင့်လှစ်ပေးသည်။ ယင်းနောက် တိုင်းဒေသကြီးဝန်ကြီးချုပ်နှင့် တာဝန်ရှိများက မသိုးသင်္ကန်းယှဉ်ပြိုင် ရက်ခတ်နေမှုများအား ကြည့်ရှုအားပေးခဲ့ပြီး ဖျော်ဖြေရေးအဖွဲ့များအား ချီးမြှင့်ငွေများပေးအပ်ခဲ့ပါသည်။ ထို့​နောက် ယက်ကန်းပြိုင်ပွဲတွင် ဆုချီးမြှင့်နိုင်​ရေးအတွက် တိုင်း​ဒေသကြီးဝန်ကြီးချုပ်နှင့် တာဝန်ရှိသူများ၊ ဒိုင်အဖွဲ့များမှ လိုက်လံကြည့်ရှုစစ်​ဆေးခဲ့ပါသည်။ ရွှေမုဋ္ဌောမဟာစေတီတော်မြတ်ကြီး၏ (၃၆)ကြိမ်မြောက် မသိုးသင်္ကန်းရက်ခတ်ယှဉ်ပြိုင်ပွဲတွင် ရက်ကန်းစင်တော်(၉)စင် ပါဝင်ယှဉ်ပြိုင်ခဲ့ကြပြီး ဘုရားဖူးလာ​ရောက်ကြသူများ မသိုးသင်္ကန်းယှဥ်ပြိုင်ရက်ခတ်မှုများအား လာ​ရောက်ကြည့်ရှု​လေ့လာသူများဖြင့် စည်ကားသိုက်မြိုက်စွာကျင်းပခဲ့ပါသည်။ နိုဝင်ဘာလ ၂၇ရက်နေ့ နံနက်ပိုင်းတွင် ပုသိမ်မြို့၏ကျက်သရေဆောင် ရှေးဟောင်းသမိုင်းဝင် ရွှေမုဋ္ဌောစေတီတော်မြတ်ကြီး၌ (၃၆)ကြိမ်မြောက် မသိုးသင်္ကန်းကပ်လှူပွဲ ရေစက်ချမင်္ဂလာအခမ်းအနားကို စေတီတော်မြတ်ကြီး၏ ရင်ပြင်တော်ပေါ်ရှိ ဦးမောင်ကြီးတန်ဆောင်း၌ ပြုလုပ်ရာ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့်ဇနီးများ၊ ဖိတ်ကြားထားသည့် ဧည့်သည်တော်များ တက်ရောက် ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်ဦးဆောင်၍ တာဝန်ရှိသူများက အေးငြိမ်းချမ်းသာဗုဒ္ဓရုပ်ပွားတော်မြတ်အား မသိုးသင်္ကန်းတော်ဆက်ကပ်လှူဒါန်းခဲ့ပြီး‌နောက် ဆရာတော်ကြီးများအား အရုဏ်ဆွမ်း ဆက်ကပ်လှူဒါန်းခဲ့သည်။ ထို့နောက် ရေစက်ချမင်္ဂလာအခမ်းအနား ဆက်လက်ကျင်းပရာ ဆရာတော်ကြီးများဦးဆောင်ပြီး ဧည့်ပရိတ်သတ်များက နမောတဿ(၃)ကြိမ်ရွတ်ဆို ဘုရားကန်တော့၍ အခမ်းအနားအား ဖွင့်လှစ်ခဲ့သည်။ ဆက်လက်၍ ဝန်ကြီးချုပ်နှင့် ဧည့်ပရိသတ်များက နိုင်ငံတော်ဩဝါဒါ စရိယ၊ ပုသိမ်မြို့၊ နိဂြောဓာရုံ ညောင်ပင်သာပရိယတ္တိ စာသင်တိုက်၏ ပဓာနနာယဆရာတော် ဘဒ္ဒန္တဝိဿုတ (အဘိဓဇမဟာရဋ္ဌဂုရု၊ အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) မဟာထေရ်မြတ်ထံမှ နဝင်္ဂသီလခံယူဆောက်တည်ကြပြီးနောက် ဆရာတော်ကြီးများထံမှ ပရိတ်တရားတော်များ ဆက်လက်နာယူကြည်ညိုကြကာ တိုင်းဒေသကြီးဝန်ကြီးချုပ်နှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့်ဇနီးများက လှူဖွယ်ပစ္စည်းများနှင့် နဝကမ္မအလှူတော်ငွေများ ဆက်ကပ်လှူဒါန်းခဲ့သည်။ ထို့နောက် တိုင်းဒေသကြီးသံဃနာယကအဖွဲ့၊ ဩဝါဒါစရိယ ပုသိမ်မြို့၊ မရမ်းချို ကျောင်းတိုက်၏ ပဓာနနာယကဆရာတော် ဘဒ္ဒန္တသောဘိတ (အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) ဘဒ္ဒန္တသောဘိတ မဟာထေရ်မြတ်ထံမှ အနုမောဒနာတရားနာကြား၍ လှူဒါန်းမှုအစုစုတို့အတွက် ရေစက်သွန်းချအမျှပေးဝေခဲ့ကြသည်။ ဆက်လက်၍ (၃၆)ကြိမ်မြောက်၊ မသိုးသင်္ကန်းရက်ခတ်ပြိုင်ပွဲတွင် နှစ်သိမ့်ဆုရရှိသည့် ရက်ကန်းစင်တော်များကို အနောက်တောင်တိုင်းစစ်ဌာနချုပ် တိုင်းမှူးနှင့် ဇနီးကလည်းကောင်း၊ တတိယဆုရရှိသော ခတ္တာရက်ကန်းစင်တော်နှင့် ဒုတိယဆုရရှိသည့်ကံ့ကော်ရက်ကန်းစင်တော်အား တိုင်းဒေသကြီး ဝန်ကြီးချုပ်၏ ဇနီးကလည်းကောင်း၊ ပထမဆုရရှိသည့် ဇီဇဝါရက်ကန်းစင်တော်အား တိုင်းဒေသကြီး ဝန်ကြီးချုပ်ကလည်းကောင်း ဆုများအသီးသီးချီးမြှင့်ခဲ့ကြပြီး အခမ်းအနားအား ဗုဒ္ဓသာသနံစိရံတိဋ္ဌတု(၃)ကြိမ် ရွတ်ဆိုဆုတောင်း၍ ရုပ်သိမ်းခဲ့သည်။ ရွှေမုဋ္ဌောမဟာစေတီတော်မြတ်ကြီး၏ (၃၆)ကြိမ်မြောက် မသိုးသင်္ကန်းကပ်လှူပူ​ဇော်ပွဲတွင် မသိုးသင်္န်းများကို ညတွင်းချင်း အပြီးရက်ခတ်ကာ အာရုံမတက်မီ ကပ်လှူပူ​​ဇော်ခဲ့​ကြောင်း သတင်းရရှိပါသည်။

ဧရာဝတီတိုင်းဒေသသကြီး အခြေခံပညာကျောင်းသားအားကစားပွဲတော် အမျိုးသား/ အမျိုးသမီးဘောလုံးပြိုင်ပွဲ ဗိုလ်လုပွဲနှင့် ဆုချီးမြှင့်ပွဲအခမ်းအနားကို ယနေ့နံနက်ပိုင်းက ပုသိမ်မြို့၊ ကိုးသိန်းအားကစားကွင်း၌ ပြုလုပ်ခဲ့ရာ ဆုချီးမြှင့်ပွဲသို့ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့် ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့် ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများနှင့် ဇနီးများ၊ ဌာနဆိုင်ရာများ၊ ‌ဆရာ၊ ဆရာမများနှင့် ကျောင်းသား၊ ကျောင်းသူများ တက်ရောက်အားပေးခဲ့ကြသည်။ ဦးစွာ တိုင်းဒေသကြီးဝန်ကြီးချုပ်နှင့် ဧည့်သည်တော်များသည် ပုသိမ်မြို့၊ ကျောက်တိုင်အားကစားကွင်း၌ ပြုလုပ်သည့် အမျိုးသမီးဘောလုံးပွဲ ဗိုလ်လုပွဲအဖြစ် ခရိုင်အုပ်စု(၁)နှင့် ခရိုင်အုပ်စု(၄)တို့၏ ယှဉ်ပြိုင်ကစားနေမှုများကိုလည်းကောင်း၊ ပုသိမ်မြို့၊ ကိုးသိန်းအားကစားကွင်း၌ ပြုလုပ်သည့် အမျိုးသားဘောလုံးပွဲ ဗိုလ်လုပွဲအဖြစ် ခရိုင်အုပ်စု(၁)နှင့် ခရိုင်အုပ်စု(၃)တို့၏ ယှဉ်ပြိုင်ကစားနေမှုအားလည်းကောင်း ကြည့်ရှုအားပေးခဲ့သည်။ အဆိုပါပွဲဗိုလ်လုပွဲများမှ အမျိုးသမီးဘောလုံးပွဲတွင် ခရိုင်အုပ်စု(၁)က ခရိုင်အုပ်စု(၄)အား လေးဂိုး- ဂိုးမရှိဖြင့်လည်းကောင်း၊ အမျိုးသားဘောလုံးပွဲတွင် ခရိုင်အုပ်စု(၁)က ခရိုင်အုပ်စု(၃)အား သုံးဂိုး- ဂိုးမရှိဖြင့်လည်းကောင်းအသီးသီးအနိုင်ရရှိခဲ့သည်။ ဆက်လက်၍ ဆုချီးမြှင့်ပွဲအခမ်းအနားကို ပြုလုပ်ရာ အမျိုးသမီးဘောလုံးပြိုင်ပွဲတွင် ဒုတိယဆုရရှိသည့် ခရိုင်အုပ်စု(၄)အား တစ်ဦးချင်းဆုတံဆိပ်နှင့် ဂုဏ်ပြုလက်မှတ်များကို အနောက်တောင်တိုင်းစစ်ဌာနချုပ်တိုင်းမှူး၏ ဇနီးကလည်းကောင်း၊ အမျိုးသားဘောလုံးပြိုင်ပွဲတွင် ဒုတိယဆုရရှိသည့် ခရိုင်အုပ်စု(၃)အား တစ်ဦးချင်းဆုတံဆိပ်နှင့် ဂုဏ်ပြုလက်မှတ်များကို အနောက်တောင်တိုင်းစစ်ဌာနချုပ်တိုင်းမှူးလည်းကောင်း၊ အမျိုးသမီးဘောလုံးပြိုင်ပွဲတွင် ပထမဆုရရှိသည့် ခရိုင်အုပ်စု(၁)အား တစ်ဦးချင်းဆုတံဆိပ်၊ ဂုဏ်ပြုလက်မှတ်များနှင့် ဆုဖလားကို တိုင်းဒေသကြီးဝန်ကြီးချုပ်၏ ဇနီးကလည်းကောင်း၊ အမျိုးသားဘောလုံးပြိုင်ပွဲတွင် ပထမဆုရရှိသည့် ခရိုင်အုပ်စု(၁)အား တစ်ဦးချင်းဆုတံဆိပ်၊ ဂုဏ်ပြုလက်မှတ်များနှင့် ဆုဖလားကို တိုင်းဒေသကြီးဝန်ကြီးချုပ်ကလည်းကောင်း အသီးသီးဆုများချီးမြှင့်ခဲ့ကြပြီး ဆုရရှိသည့်အသင်းများနှင့်အတူ အမှတ်တရစုပေါင်းမှတ်တမ်းတင် ဓာတ်ပုံများရိုက်ကူးခဲ့ကြပြီး‌နောက် တိုင်းဒေသကြီး ဝန်ကြီးချုပ်က ဧရာဝတီတိုင်းဒေသသကြီး အခြေခံပညာကျောင်းသားအားကစားပွဲတော်အတွက် ထောက်ပံ့ငွေများကိုပေးအပ်ရာ တိုင်းဒေသကြီးပညာရေးမှူးနှင့် အားကစားပွဲ​တော်ကျင်းပ​ရေး အဖွဲ့ခေါင်းဆောင်တို့ကလက်ခံရယူခဲ့သည်။ ယင်းနောက် တိုင်းဒေသကြီး ဝန်ကြီးချုပ်သည် ဆုရရှိသည့်အသင်းများမှ အားကစားသမားများအား ရင်းရင်းနှီးနှီးနှုတ်ဆက်ခဲ့ပြီး တိုင်း​ဒေသကြီး/ပြည်နယ် အခြေခံပညာကျောင်းသားအားကစားပွဲတော် တွင်လည်း တိုင်း​ဒေသကြီးဂုဏ်​ဆောင်နိုင်ကာ ဆုများရရှိအောင်ကြိုးစားကြရန်နှင့် စခန်းသွင်းလေ့ကျင့်ရာတွင်လည်း နည်းပြများ၏ သင်ကြားပြသမှုများကို ကြိုးစားလိုက်နာ လေ့ကျင့်ကြရန် လမ်းညွှန်မှာကြားခဲ့ပါသည်။