၂၀၂၃-၂၀၂၄ပညာသင်နှစ်၊ မောင်မယ်သစ်လွင်ကြိုဆိုပွဲ အခမ်းအနားကို ယနေ့နံနက်ပိုင်းက ဟင်္သာတတက္ကသိုလ်၊ ဘွဲ့နှင်းသဘင်ခန်းမ၌ ပြုလုပ်ခဲ့ရာ အခမ်းအနားသို့ ဧရာဝတီတိုင်းဒေသကြီး ဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ ပါမောက္ခချုပ်၊ ဒုတိယပါမောက္ခချုပ်များနှင့် ပါမောက္ခ(ဌာနမှူး)များ၊ ဆရာဆရာမများ၊ ​မောင်မယ်သစ်လွင်များ တက်ရောက်ခဲ့ကြသည်။ ဦးစွာ တိုင်းဒေသကြီးဝန်ကြီးချုပ်က “ တိုင်းဒေသကြီးအတွင်းရှိ တက္ကသိုလ်၊ ကောလိပ်သိပ္ပံအသီးသီးတွင် မောင်မယ်သစ်လွင်ကြိုဆိုပွဲများ ကျင်းပနေကြပါကြောင်း၊ မောင်တို့မယ်တို့အနေဖြင့် အခြေခံပညာလွန်မြောက်၍ အဆင့်မြင်ပညာများကို စတင်လေ့လာဆည်းပူးရမည်ဖြစ်ပါကြောင်း၊ တက္ကသိုလ်ကြီးတွင် စတင်ပညာဆည်းပူးမည့် မောင်တို့မယ်တို့အား တက္ကသိုလ်ရှိ ပါမောက္ခချုပ်၊ ဒုတိယပါမောက္ခချုပ်နှင့် ပါမောက္ခများ၊ ဆရာ၊ ဆရာမများက နွေးထွေးစွာကြိုဆိုကြခြင်းဖြစ်ပါကြောင်း၊​ မောင်တို့မယ်တို့အ​နေဖြင့် အခြေခံပညာကို မိဘအုပ်ထိန်းမှုဖြင့်သင်ယူအောင်မြင်ခဲ့ရာ မှ တက္ကသိုလ်သို့​ရောက်ရှိလာချိန်တွင် ကိုယ်ပိုင်စဥ်းစားဆင်ခြင်တွေးခေါ်မှု ဆုံးဖြတ်မှုတို့ဖြင့်လေ့လာဆည်းပူးသွားရမည်ဖြစ်ပါကြောင်း၊ ထို့အပြင် တက္ကသိုလ်ကျောင်းတော်ကြီးတွင် မိမိတို့ဝါသနာပါသည့် အားကစား၊ စာပေ ၊ ဂီတ၊ အနုပညာဆိုင်ရာ များကိုလည်း ဖော်ထုတ်ပြသနိုင်ရန်အတွက် အခွင့်အလမ်းကောင်းများကို ဖန်တီးရယူနိုင်သည့် နေရာလည်းဖြစ်ပါကြောင်း၊ ဧရာဝတီတိုင်းဒေသကြီး၏ သဘာဝအရင်းအမြစ်များကို အသုံးချနိုင်ပြီး ဒေသအကျိုးကို ရှေးရှုပို့ချပေးမည့် စိုက်ပျိုးရေးဓာတုဗေဒဌာန( Agricultural Chemistry)၊ ငါးပညာသိပ္ပံ( Fisheries Science)ဆိုသည့် အသုံးချဘာသာရပ်နှစ်ခုကိုလည်း အောင်မြင်စွာဖွင့်လှစ်နိုင်ခဲ့ပြီဖြစ်ပါကြောင်း၊ ထို့ပြင် မောင်တို့မယ်တို့အနေဖြင့် မြန်မာ့ရိုးရာ အဆို၊ အက၊ အရေး၊ အတီး ပြိုင်ပွဲတွင် အဆင့်မြင့်ပညာကဏ္ဍအတွက် တိုင်းဒေသကြီးကိုယ်စားပြု ပါဝင်ယှဉ်ပြိုင်နိုင်​ရေး​ဆောင်ရွက်ကြရန်လို​ကြောင်း၊ ​မောင်တို့မယ်တို့အ​နေဖြင့် ကျောင်းတွင်းလှုပ်ရှားမှုများ၊ လူမှု​ရေးအသင်းအဖွဲ့များတွင်လည်း စည်းစည်းလုံးလုံးညီညီညွတ်ညွတ် ​ပါဝင်ဆောင်ရွက်ကြရန်လို​ကြောင်း၊ မောင်မယ်သစ်လွင်တို့အနေဖြင့် အဆင့်မြင့်ပညာများကိုလေ့လာဆည်းပူးပြီး သုတေသနပြုမှု၊ တီထွင်ဖန်တီးမှုများကို တိုးတက်အောင်မြင်အောင် ကြိုးစားရင်းဖြင့် ဒေသနှင့် နိုင်ငံအကျိုး ကိုယ်စွမ်းဉာဏ်စွမ်းရှိသမျှ ကြိုးစားဖော်ဆောင်ပေးနိုင်ပြီး ဗလငါးတန်နှင့် ပြည့်စုံသည့် ပညာတတ်လူငယ် ​မောင်မယ်များ ဖြစ်ပါစေကြောင်း” မောင်မယ်သစ်လွင်များအား ကြိုဆိုနှုတ်ခွန်းဆက် အမှာစကားများပြောကြားသည်။ ထို့နောက် ဟင်္သာတတက္ကသိုလ် ပါမောက္ခချုပ်က ​​နွေး​ထွေးစွာ ကြိုဆိုနှုတ်ခွန်းဆက်စကားများ ဆက်လက်ပြောကြားခဲ့ပြီးနောက် ဟင်္သာတတက္ကသိုလ် သင်ကြားရေး၊ စီမံခန့်ခွဲရေး အကြီးအကဲများနှင့် မောင်မယ်သစ်လွင်များအား မိတ်ဆက်ပေးခဲ့သည်။ ဆက်လက်၍ ဝိဇ္ဇာဘာသာရပ်များအကြောင်း သိကောင်းစရာများကို ဒဿနိကဗေဒဌာန ပါမောက္ခ(ဌာနမှူး)နှင့် သိပ္ပံဘာသာရပ်များအကြောင်း သိကောင်းစရာများကို ဓာတုဗေဒနှင့် စိုက်ပျိုးရေးဓာတုဗေဒဌာန ပါမောက္ခ(ဌာနမှူး) တို့က ဘာသာရပ်များ၏ အရည်အ​သွေး၊ အ​ရေးပါမှု၊ သင်ကြားရခြင်း၏ရည်ရွယ်ချက်၊ ရရှိမည့်အကျိုး​ကျေးဇူးများအား ရှင်းလင်းတင်ပြခဲ့ကြပြီးနောက် မောင်မယ်သစ်လွင်များကိုယ်စား ကျောင်းသူတစ်ဦးကကျေးဇူးတင်စကားများ ပြောကြားခဲ့ပြီး အခမ်းအနားအား ရုတ်သိမ်းခဲ့ပါသည်။ ထို့​နောက် တိုင်း​ဒေသကြီးဝန်ကြီးချုပ်က ​မောင်မယ်သစ်လွင်များအား ရင်းရင်းနှီးနှီး နှုတ်ဆက်ခဲ့ပါသည်။

၂၀၂၃-၂၀၂၄ ပညာသင်နှစ်၊ ဧရာတီတိုင်းဒေသကြီး ပညာရေးစုံညီပွဲတော် အခမ်းအနားကို ယနေ့နံနက်ပိုင်းက ပုသိမ်မြို့၊ အမှတ်(၁)အခြေခံပညာအထက်တန်းကျောင်း၌ ပြုလုပ်ခဲ့ရာ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့် ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့် ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင်ဝန်ကြီးများနှင့် ဇနီးများ၊ ဌာနဆိုင်ရာများ၊ ဆရာ၊ ဆရာမများနှင့် ကျောင်းသား၊ ကျောင်းသူများ တက်ရောက်ခဲ့ကြသည်။ ဦးစွာ ၂၀၂၃-၂၀၂၄ ပညာသင်နှစ်၊ ဧရာတီတိုင်းဒေသကြီး ပညာရေးစုံညီပွဲတော် မုခ်ဦးအား တိုင်းဒေသကြီးဝန်ကြီးချုပ်၊ အနောက်တောင်တိုင်းစစ်ဌာနချုပ်တိုင်းမှူးနှင့် တိုင်းဒေသကြီး ပညာရေးမှူးတို့က ဖဲကြိုးဖြတ်ဖွင့်လှစ်ပေးပြီး စုပေါင်းမှတ်တမ်းတင် ဓာတ်ပုံများရိုက်ကူးခဲ့သည်။ ယင်းနောက် အခမ်းအနားကို ရတနာတန်ဆောင်ခန်းမ၌ ဆက်လက်ပြုလုပ်ရာ ပုသိမ်မြို့၊ အမှတ်(၆) အခြေခံပညာအထက်တန်းကျောင်းမှ ကျောင်းသား၊ ကျောင်းသူလေးများက “စုံညီပွဲတော်တို့နွှဲပျော်”သီချင်းဖြင့် သီဆိုဖျော်ဖြေခဲ့ပြီးနောက် တိုင်းဒေသကြီးဝန်ကြီးချုပ်က“ ယခုကျင်းပသည့် ပညာရေးစုံညီပွဲတော်ကြီးတွင် (၂၀၂၃-၂၀၂၄) ပညာသင်နှစ်အတွင်း ကာယ၊ ဉာဏ စွမ်းရည်ထူးချွန်ဆု ရရှိသူများနှင့် ထူးချွန်ထက်မြက်သည့် ဆရာ၊ ဆရာမများကို ဂုဏ်ပြုချီးမြှင့်သည့်ပွဲဖြစ်ပါကြောင်း၊ အရည်အချင်းပြည့်ဝသည့် ကျောင်းသားကျောင်းသူများ၊ ကာယ၊ ဉာဏ၊ စာရိတ္တ ဘက်စုံထူးချွန်သူများကို ဂုဏ်ပြုချီးမြှင့်ပြီး ကျောင်းသား၊ ကျောင်းသူများက လေးစားအတုယူလိုက်နာကြရန်နှင့် မိဘများကလည်း ပညာရေးစနစ်သစ်၏ သဘောတရားများကို စုံညီပွဲတော် ကျင်းပပေးခြင်းအားဖြင့် သိရှိနားလည်လာကြမည် ဖြစ်ပါကြောင်း၊ ဆရာ၊ ဆရာမများ၏ အရည်အသွေး တိုးတက်စေရန်အတွက် ဘာသာရပ် မွမ်းမံ သင်တန်းများ၊ သင်ထောက်ကူပစ္စည်းအသုံးချမှု အရည်အသွေးမြှင့်သင်တန်းများ၊ အောင်ချက် မြင့်မားရေး အလုပ်ရုံဆွေးနွေးပွဲများကိုလည်း ဖွင့်လှစ်ပို့ချပေးလျှက်ရှိပါကြောင်း၊ တိုင်းဒေသကြီးသည် အခြေခံပညာကျောင်းတက်ရောက်မှုအများဆုံး၊ ကျောင်းဖွင့်လှစ်မှု အများဆုံးတိုင်းဒေသကြီးဖြစ်ပါကြောင်း၊ ပညာတတ် လူသားအရင်းအမြစ်များ များစွာပေါ်ထွန်းလာမည့် တိုင်းဒေသကြီးဖြစ်သဖြင့် တိုင်းဒေသကြီး၏ စိုက်ပျိုး မွေးမြူရေးလုပ်ငန်းများအားအခြေခံ၍ အကောင်အထည်ဖော် ဆောင်ရွက်မည်ဆိုပါက အခွင့်အလမ်းကောင်းများ များစွာရရှိလာမည့် တိုင်းဒေသကြီးဖြစ်ပါကြောင်း၊ ပညာရေးတိုးတက် အားကောင်းသည့် တိုင်းဒေသကြီးဖြစ်သောကြောင့် ကလေးများ၏ ပညာသင်ယူခွင့် အခွင့်အလမ်းများ မဆုံးရှုံးစေရေး စီမံဆောင်ရွက်ရန် လမ်းညွှန်မှာကြားခဲ့ပါကြောင်း၊ ထို့ကြောင့် တိုင်းဒေသကြီးအစိုးရအဖွဲ့အနေဖြင့် အခြေခံပညာကျောင်းများ၊ ဘုန်းတော်ကြီးသင် ပညာရေးကျောင်းများ၊ ကိုယ်ပိုင်ကျောင်းများအပါအဝင် ကျောင်းပေါင်း(၇၂၀၀)ကျော်တွင် တက်ရောက်နေကြသည့် အခြေခံပညာ ကျောင်းသား၊ ကျောင်းသူပေါင်း (၁၁)သိန်း နှစ်သောင်းကျော်၏ အောင်ချက်မြင့်မားရေး၊ ယခုနှစ် စနစ်သစ်ပညာရေး Grade 12 တွင် ဖြေဆိုအောင်မြင်နိုင်ရေး ကြိုးပမ်းဆောင်ရွက်လျက်ရှိပါကြောင်း၊ နိုင်ငံတော် စီမံအုပ်ချုပ်ရေးကောင်စီအနေဖြင့် စနစ်သစ်ပညာရေးကို KG+12 ထိ ဖော်ဆောင်လျက်ရှိပြီး KG+9 အခြေခံပညာအလယ်တန်းအဆင့်အထိ ပညာသင်ကြားခွင့်ရရေးကို အကောင်အထည်ဖော် ဆောင်ရွက်ပေးလျက်ရှိပါကြောင်း၊ တိုင်းဒေသကြီးတွင် အလယ်တန်းအဆင့် Grade-9 ပြီးမြောက်အောင်မြင်ပြီး သက်မွေးပညာဆက်လက်သင်ယူလိုသော ကျောင်းသား၊ ကျောင်းသူ များအတွက် ဒေးဒရဲ၊ ကန်ကြီးထောင့်၊ ကြံခင်း၊ ညောင်တုန်း မြို့နယ်များတွင် အခြေခံပညာနှင့် စက်မှု၊ စိုက်ပျိုးရေး၊ မွေးမြူရေးအထက်တန်းကျောင်းများကို ၂၀၂၃-၂၀၂၄ ပညာသင်နှစ်တွင် စတင်ဖွင့်လှစ်သင်ကြားခဲ့ပါကြောင်း၊ ၂၀၂၄-၂၀၂၅ ပညာသင်နှစ်တွင်လည်း ကျုံပျော်၊ ဟင်္သာတ၊ မြောင်းမြ၊ လပွတ္တာမြို့နယ်များတွင် ဆက်လက်ဖွင့်လှစ် သင်ကြားပေးသွားမည်ဖြစ်ပါကြောင်း၊ မိဘအုပ်ထိန်းသူများအနေဖြင့်လည်း မိမိတို့သားသမီးများ ပညာရည်တိုးတက်စေရေးအတွက် အမြဲမပြတ်ကြပ်မတ် ဆောင်ရွက်နေရမည်ဖြစ်ပါကြောင်း၊ ဆရာ၊ ဆရာမများအနေဖြင့်လည်း ကျောင်းသား၊ ကျောင်းသူများအား မိမိရင်ဝယ်သားကဲ့သို့ စေတနာ၊ ဝါသနာ၊ အနစ်နာဆိုသည့် နာ(၃)နာနှင့် ဘက်စုံထူးချွန်ပြီး အမျိုးဘာသာ သာသနာကို စောင့်ရှောက်နိုင်သော နိုင်ငံ သားကောင်း သမီးမွန်များဖြစ်အောင် ကြိုးစားသင်ကြားပေးဖို့တိုက်တွန်း မှာကြားလိုပါကြောင်း" အမှာစကားများ ပြောကြားသည်။ ဆက်လက်၍ တိုင်းဒေသကြီးပညာရေးမှူးက ပညာရေးစုံညီပွဲတော်ကျင်းပရခြင်း အကြောင်းအရင်းများအား ရှင်းလင်းတင်ပြခဲ့ပါသည်။ ထို့နောက် ဆုချီးမြှင့်ခြင်းနှင့် ဖျော်ဖြေရေး အစီအစဉ်များကိုပြုလုပ်ရာ လွတ်လပ်ရေးနေ့အထိမ်းအမှတ် မူလတန်း၊ အလယ်တန်း၊ အထက်တန်းအဆင့် စာစီစာကုံးပြိုင်ပွဲနှင့် Sukura Science High School Program (SSHP) in JFY 2023 သို့ လေ့လာရေးခရီးသွားရောက်ရန် ဆုရရှိသူများကို ပုသိမ်လေတပ်စခန်း ဌာနချုပ်မှူး နှင့်ဇနီးကလည်းကောင်း၊ ကမ္ဘာ့ဆရာများနေ့အထိမ်းအမှတ် အထက်တန်းအဆင့်၊ အလယ်တန်း အဆင့်ပြိုင်ပွဲ၊ National ICT Awards 2023(မူလတန်းအဆင့်)ပြိုင်ပွဲ၊ မြန်မာ အမျိုးသမီးများနေ့ အထိမ်းအမှတ်စာစီစာကုံးပြိုင်ပွဲနှင့် ကမ္ဘာ့ဆရာများနေ့ဆောင်ပါးပြိုင်ပွဲတွင် ဆုရရှိသူများကို အနောက်တောင်တိုင်းစစ်ဌာနချုပ် တိုင်းမှူးနှင့် ဇနီးကလည်းကောင်း၊ အဂတိတိုက်စားမှု တိုက်ဖျက်ရေးနေ့ အထိမ်းအမှတ်စာစီစာကုံးပြိုင်ပွဲ၊ ကမ္ဘာ့ဆရာများနေ့ အလယ်တန်းအဆင့် စာစီစာကုံးပြိုင်ပွဲ၊ National ICT Awards 2023 (အလယ်တန်းနှင့် မူလတန်းအဆင့်) ပြိုင်ပွဲများတွင် ဆုရရှိသူများကို တိုင်းဒေသကြီးဝန်ကြီးချုပ်၏ ဇနီးကလည်းကောင်း၊ National ICT Awards 2023 (ဆရာအဆင့်အဖွဲ့လိုက်)ပြိုင်ပွဲ၊ National ICT Awards 2023 (အထက်တန်း အဆင့်ပြိုင်ပွဲ)၊ Clean and Green School ဆု၊ အဂတိလိုက်စားမှု တိုက်ဖျက်ရေးနေ့ အထိမ်း အမှတ်စာစီစာကုံးပြိုင်ပွဲများတွင် ဆုရရှိသူများကို တိုင်းဒေသကြီး ဝန်ကြီးချုပ်ကလည်းကောင်း ဂုဏ်ပြုဆုများနှင့် ဖျော်ဖြေရေးအကအဖွဲ့များအတွက် ချီးမြှင့်ငွေများပေးအပ်ချီးမြှင့်ခဲ့ပြီး ကျောင်းသား၊ ကျောင်းသူလေးများ၏ တေးသီချင်းများဖြင့် သီဆိုကပြ ဖျော်ဖြေမှုများကို ကြည့်ရှု အားပေးခဲ့ပါသည်။ ထို့နောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် ခရိုင်အလိုက် ခင်းကျင်းပြသထားသည့် ဧရာဝတီတိုင်းဒေသကြီး ပညာရေးစုံညီပွဲတော်ပြခန်းများအား လှည့်လည်ကြည့်ရှုခဲ့ပါသည်။ ထို့နောက် ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် (၁၄.၁.၂၀၂၄) ရက်နေ့ ညနေပိုင်းက တိုင်းဒေသကြီးအစိုးရအဖွဲ့ဝင်ဝန်ကြီးများ၊ တာဝန်ရှိသူများနှင့်အတူ ပုသိမ်မြို့၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ တိုင်းဒေသကြီးဦးစီးမှူးရုံးသို့သွား​ရောက်၍ တိုင်းဒေသကြီးအတွင်းရှိ ခရိုင်(၈)ခရိုင်၊ မြို့နယ်(၂၆)မြို့နယ်တွင် (၁.၂.၂၀၂၄)တွင် အသက် (၁၈)နှစ်နှင့်အထက် လူဦးရေစာရင်း စိစစ်အတည်ပြုနိုင်ရေးအတွက် ခရိုင်၊ မြို့နယ် မြေပြင်ကွင်းဆင်းစစ်ဆေးရေးအဖွဲ့ ကြီးကြပ်မှုကော်မတီများမှ စိစစ်အတည်ပြုထားသည့် လူဦးရေစာရင်းများ မှန်ကန်မှုရှိမရှိ စိစစ်ဆောင်ရွက်နေမှုများအား လိုက်လံကြည့်ရှုစစ်ဆေးခဲ့ပြီး တိုင်းဒေသကြီးဝန်ကြီးချုပ်က ကျေးရွာ၊ ရပ်ကွက်၊ မြို့နယ်၊ ခရိုင်အလိုက် စာရင်းဇယား၊ အချက် အလက်များ တိကျမှန်ကန်မှုရှိစေရေး အထူးအလေးထား ဆောင်ရွက်ကြရန် မှာကြားခဲ့ကြောင်း သတင်းရရှိပါသည်။

ဧရာဝတီတိုင်းဒေသကြီး၊ ပုသိမ်ခရိုင်၊ ငပု​တောမြို့နယ်၊ ဟိုင်းကြီးကျွန်းမြို့၊ ဇီးချိုင်ကျေးရွာအုပ်စု၍တည်ထား ကိုးကွယ်တော်မူသည့် မဟာမကုဋရံသီ ဆံတော်ရှင် မြတ်မော်တင်စေတီတော်မြတ်ကြီး၏ ရင်ပြင်တော်တိုးချဲ့တည်ဆောက်ခြင်းလုပ်ငန်းများကို တိုင်းဒေသကြီး ဝန်ကြီးချုပ် ဦးတင်မောင်ဝင်းသည် ယနေ့နံနက်ပိုင်းက အစိုးရအဖွဲ့ဝင်ဝန်ကြီးများနှင့်အတူ သွားရောက်ကြည့်ရှု စစ်ဆေးခဲ့သည်။ ဦးစွာ တိုင်းဒေသကြီးဝန်ကြီးချုပ်သည် ​မဟာမကုဋရံသီ ဆံတော်ရှင် မြတ်မော်တင်စေတီတော်မြတ်ကြီး​မြောက်ဘက်မုခ် ​ရေကန်လုပ်ငန်း​၊ ​မြေထိန်းနံရံလုပ်ငန်း၊ ယာဥ်ရပ်နားကွင်းလုပ်ငန်း​၊ မြတ်​မော်တင်စွန်းဘုရားအဝင်လမ်းလုပ်ငန်း၊ စေတီ​တော်မြတ်ကြီး အ​နေကဇာ​ဆောင် ပြုပြင်မွမ်းမံမှုများ၊ စေတီ​တော်ကြီး၏ ​ရင်ပြင်တွင် နေပူခံ​ကျောက်ပြားခင်းကျင်းနေမှုများ၊ ​စေတီ​တော်မြတ်ကြီး ပန်းတင်ခုံမြန်မာမှုလုပ်ငန်းဆောင်ရွက်နေမှုများ၊ မဟာရံတံတိုင်းလုပ်ငန်း​ဆောင်ရွက်​နေမှုများ၊ မဟာရံတံတိုင်း စိန်​တောင် မြန်မာမှုလုပ်ငန်းဆောင်ရွက်နေမှုများ၊ စေတီ​တော်မြတ်ကြီးရင်ပြင် အောက်အနှုတ်(၁၂)level ပွတ်လုံးလက်ရမ်း​တပ်ဆင်ဆောင်ရွက်​နေမှုများ၊ စေတီတော်ရင်ပြင်အောက်ဘက်ရှိ ကမ်းခြေဆင်းလမ်း ဆောင်ရွက်နေမှုအခြေအနေများအားကြည့်ရှုစစ်ဆေးခဲ့ပြီး ဘုရားဖူးပြည်သူများအား ရင်းရင်းနှီးနှီး​နှုတ်ဆက်ခဲ့ပါသည်။ ထို့​နောက် ကုမ္ပဏီတာဝန်ရှိသူမှ မြတ်​မော်တင် ဆံ​တော်ရှင်​စေတီ​တော်မြတ်ကြီး၏ ရင်ပြင်​တော်တိုးချဲ့ခြင်း၊ ပြုပြင်မွမ်းမံခြင်းလုပ်ငန်းများနှင့်ပတ်သက်၍ ရှင်းလင်းတင်ပြရာ တိုင်း​ဒေသကြီးဝန်ကြီးချုပ်က ​ရေရှည်တည်တံ့ခိုင်မြဲ​စေ​ရေးအတွက် တည်ဆောက်ရေး လုပ်ငန်းများအရည်အသွေးပြည့်မီ​​အောင်ရွက်ရန်၊ မြန်မာမှုလက်ရာ လက်သားများ သေသပ်​ကောင်းမွန်​​စေရန်နှင့် သာသနိကအ​ဆောက်အဦများ ဥပဒိရုပ်​ကောင်းမွန်​အောင်​ဆောင်ရွက်ရန်၊ ​စေတီ​တော်ကြီး၏ ပရဝဏ်အတွင်း စိမ်းလန်းစို​ပြေ​​​အောင်​ဆောင်ရွက်ရန်၊ ဘုရားအဝင်လမ်း​ လမ်းဘေးဝဲယာတွင် အရိပ်ရအပင်များ၊ အလှပန်းပင်များစိုက်ပျိုးရန်၊ နဂါးလမ်း၊ ​လှေကားအတက်အဆင်းလမ်းများ ပြေပြစ်စေရေးဆောင်ရွက်ရန်၊ ဘုရားပွဲ​တော်ကာလတွင် လာရောက်ဖူး​မြှော်သူများ များပြားသဖြင့် ယာဥ်ရပ်နားကွင်းများ​ဆောင်ရွက်​ပေးရန်၊ အပြီးသတ်လုပ်ငန်းများ​ဆောင်ရွက်​နေပြီဖြစ်သဖြင့် အလှူရှင်များ ပါဝင်လှူဒါန်းနိုင်​ရေး​​ဆော်သြကြရန်၊ လုပ်ငန်း​ဆောင်ရွက်မှုများ သတ်မှတ်ကာလအတွင်းပြီးစီးစေရေး အင်အားပြည့်ဆောင်ရွက်ရန်၊ အနီးကပ်ကြီးကြပ် ​ဆောင်ရွက်သည့်အဖွဲ့မှ လုပ်ငန်းအားလုံးဘုရားပွဲတော်ကျင်းပရက်မတိုင်မီပြီးစီးရေးကြပ်မတ်ဆောင်ရွက်ရန်နှင့် တည်ဆောက်ရေးလုပ်ငန်းသုံးပစ္စည်းများကြိုတင်ရှင်းလင်းဖယ်ရှားရန်၊ လုပ်ငန်းခွင်အန္တရာယ်ကင်းရှင်းစေရေးနှင့်သန့်ရှင်းမှုရှိစေရေး အလေးထားဆောင်ရွက်ရန် မှာကြားခဲ့ပြီး​ စေတီ​တော်မြတ်ကြီးအား ပန်း၊ ရေချမ်းကပ်လှူပူ​ဇော်၍ ဖူးမြော်ကြည်ညိုခဲ့ပြီး လှည့်လည်ကြည့်ရှုစစ်​ဆေးခဲ့ပါသည်။

ပုသိမ်မြို့ကျက်သရေဆောင် သမိုင်းဝင် ရွှေမုဌောမဟာစေတီတော်မြတ်ကြီးနှင့် အရံစေတီတော်များ၊ ဆင်းတုတော်များ လုံးတော်ပြည့်ရွှေသင်္ကန်းကပ်လှူနိုင်ရေး ပထမအကြိမ် အလှူတော်ငွေပေးအပ်လှူဒါန်းပွဲအခမ်းအနားကို ယနေ့မွန်းလွဲပိုင်းက စေတီတော်မြတ်ကြီး၏ ရင်ပြင်​တော်ရှိဦးမောင်ကြီးအာရုံခံတန်ဆောင်းတွင် ကျင်းပပြုလုပ်ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့်ဇနီး၊ အစိုးရအဖွဲ့ဝင် ဝန်ကြီးများနှင့် ဇနီးများ၊ အလှူရှင်များ တက်ရောက်ခဲ့ကြသည်။ ဦးစွာ “နမောတဿ” သုံးကြိမ်ရွတ်ဆို ဘုရားကန်တော့၍ အခမ်းအနားအားဖွင့်လှစ်ခဲ့ပြီး နိုင်ငံတော်ဩဝါဒါစရိယ၊ ပုသိမ်မြို့၊ ညောင်ပင်သာပရိယတ္တိစာသင်တိုက် ဦးစီးပဓာနနာယက ဆရာတော် (အဘိဓဇမဟာရဋ္ဌဂုရု၊ အဘိဓဇအဂ္ဂမဟာသဒ္ဓမ္မဇောတိက၊ အဂ္ဂမဟာပဏ္ဍိတ) ဘဒ္ဒန္တဝိဿုတ မဟာထေရ်မြတ်ထံမှ ဧည့်ပရိသတ်များကငါးပါးသီလ ခံယူဆောက်တည်ခဲ့ကြပြီး တိုင်းဒေသကြီးဝန်ကြီးချုပ်က သာသနာရေးဆိုင်ရာကိစ္စများအား တင်ပြလျှောက်ထားခဲ့ပြီးနောက် တိုင်းဒေသကြီးဝန်ကြီးချုပ်နှင့်ဇနီး၊ အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ ပုသိမ်လေတပ်စခန်းဌာနချုပ်မှူးနှင့် ဇနီး၊ အစိုးရအဖွဲ့ဝင် ဝန်ကြီးများက ဆရာတော်သံဃာတော် အရှင်သူမြတ်မျာအား လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့သည်။ ဆက်လက်၍ အလှူရှင်များက အလှူတော်ငွေများကို ပေးအပ်လှူဒါန်းရာ တိုင်းဒေသကြီးဝန်ကြီးချုပ်နှင့် တာဝန်ရှိသူအသီးသီးက လက်ခံခဲ့ပြီး အလှူရှင်များအား ဂုဏ်ပြုမှတ်တမ်းလွှာများပြန်လည်ပေးအပ်ခဲ့သည်။ ထို့နောက် တိုင်းဒေသကြီးသံဃနာယကအဖွဲ့၊ ဩဝါဒါစရိယ၊ ပုသိမ်မြို့၊ မရမ်းချို ကျောင်းတိုက်၏ ပဓာနနာယကဆရာတော် (အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မဇောတိကဓဇ) ဘဒ္ဒန္တသောဘိတ မဟာထေရ်မြတ်ထံမှ လှူဒါန်းမှုအစုစုတို့အတွက် အနုမောဒနာတရား နာကြား၍ ရေစက်သွန်းချအမျှပေးဝေခဲ့ပြီး အခမ်းအနားအား "ဗုဒ္ဓသာသနံ စိရံတိဋ္ဌတု" သုံးကြိမ်ရွတ်ဆိုဆုတောင်း၍ ရုပ်သိမ်းခဲ့ကြောင်းသိရသည်။

ဧရာဝတီတိုင်းဒေသကြီး၊ ပုသိမ်မြို့၌ ဌာနဆိုင်ရာများနှင့်ပြည်သူများ စုပေါင်းသန့်ရှင်းရေး ဆောင်ရွက်နေမှုများကို တိုင်းဒေသကြီးဝန်ကြီးချုပ်ဦးတင်မောင်ဝင်းသည် တာဝန်ရှိသူများနှင့် အတူ ယနေ့နံနက်ပိုင်းက လှည့်လည်ကြည့်ရှုစစ်ဆေးခဲ့သည်။ ဦးစွာ တိုင်းဒေသကြီးဝန်ကြီးချုပ်သည် ပုသိမ်မြို့၊ စက်တော်ရာဘိုးဘွားရိပ်သာ အတွင်း၌ နယ်မြေခံတပ်ရင်းတပ်ဖွဲ့များ၊ ဌာနဆိုင်ရာများနှင့်ပြည်သူများက အပတ်စဉ်စနေနေ့တိုင်း စုပေါင်း သန့်ရှင်းရေးဆောင်ရွက်နေမှုများကို လှည့်လည်ကြည့်ရှုအားပေးခဲ့ပြီး စုပေါင်းသန့်ရှင်းရေး ဆောင်ရွက်ခြင်းတို့ကို အပတ်စဉ်ဆောင်ရွက်ခြင်းများအပြင် နေ့စဉ်သန့်ရှင်း သပ်ရပ်မှုရှိစေရေး ကိုလည်း အလေးထားလိုက်နာ ဆောင်ရွက်သွားရန်နှင့် မြို့သန့်ရှင်းသာယာလှပစေရေး အစဉ် တစိုက်ဆောင်ရွက်ကြရန် မှာကြားခဲ့သည်။ ထို့အတူ တိုင်းဒေသကြီးဝန်ကြီးချုပ်သည် ရေကြည်ဦး ရပ်ကွက်ရှိ လေးကျွန်းရန်အောင်ဖောင်တော်ဦးစေတီတော်မြတ်ကြီး ပရဝဏ်အတွင်း၌ စုပေါင်း သန့်ရှင်းရေးဆောင်ရွက်နေမှုများအား ကြည့်ရှုစစ်ဆေးခဲ့ပြီး မြို့ပေါ်ရပ်ကွက်များတွင် သန့်ရှင်းရေး ဆောင်ရွက်ထားရှိမှုများကို လှည့်လည်ကြည့်ရှုစစ်ဆေးခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်အမှတ်(၁) ကြိုးတံတားအဆင်း ငွေဆောင်၊ ချောင်းသာလမ်းခွဲကြက်လျှာစွန်း၌ စုပေါင်းသန့်ရှင်းရေး ဆောင်ရွက်နေမှုများကို သွားရောက်ကြည့်ရှုစစ်ဆေးပြီး မြို့ဝင်မြို့ထွက်များတွင် ပန်းအလှပင်များ စနစ်တကျစိုက်ပျိုး ထားရှိရေး၊ မြက်ခင်းများစိမ်းလန်းစိုပြေရေးနှင့် လမ်းဘေးဝဲယာသန့်ရှင်း လှပရေးအတွက် အလေးထားဆောင်ရွက်ရန် တာဝန်ရှိသူများကို မှာကြားခဲ့ပါသည်။