ဧရာဝတီတိုင်းဒေသကြီး ဝန်ကြီးချုပ်သည် အစိုးရအဖွဲ့ဝင် ဝန်ကြီးများနှင့်အတူ မြန်အောင်ခရိုင်၊အင်္ဂပူမြို့နယ်အထွေထွေအုပ်ချုပ်ရေးဦးစီးဌာနအစည်းအဝေးခန်းမ၌ ပြူလုပ်သည့် နိုင်ငံ့စီးပွားမြှင့်တင်ရေးရန်ပုံငွေ မတည်ထောက်ပံ့ငွေများအား လွှဲပြောင်းပေးအပ်ပွဲ၊၂၀၂၃ - ၂၀၂၄ ဘဏ္ဍာရေးနှစ်တွင် အကောင်အထည်ဖော်ဆောင်ရွက်မည့် ကျေးရွာဖွံ့ဖြိုးရေးစီမံကိန်း၊မြစိမ်းရောင်ကျေးရွာ စီမံကိန်းရန်ပုံငွေပေးအပ်ပွဲနှင့် တောင်သူများသို့ မျိုးစပါးနှင့် သွင်းအားစုများပေးအပ်ပွဲအခမ်းအနားသို့ တက်ရောက်ခဲ့ရာ ရှေးဦးစွာ မြန်အောင်ခရိုင်စီမံအုပ်ချုပ်ရေးအဖွဲ့ ဥက္ကဋ္ဌက  မိုးစပါးတစ်ဧက(၁၀)တင်းနှုန်းပိုမိုတိုးတက်ထွက်ရှိရေးအတွက် ဆောင်ရွက်ထားရှိမှုအခြေအနေများအား ရှင်းလင်းတင်ပြသည်။  ဆက်လက်၍ တိုင်းဒေသကြီး ဝန်ကြီးချုပ်က စိုက်ပျိုးစွမ်းအား မြင့်မားရေးနှင့် ပန်းတိုင်အထွက် နှုန်းရောက်ရှိစေရေးအတွက် တစ်ဧက(၁၀)တင်းနှုန်းပိုမိုတိုးတက် ထွက်ရှိရေးအတွက်    စီမံချက်များချမှတ် ဆောင်ရွက်လျက်ရှိပါကြောင်း၊မြန်အောင်ခရိုင်သည် နေကြာ၊ မြေပဲ၊ နှမ်းစသည့် ဆီထွက်သီးနှံများ စိုက်ပျိုးဖြစ်ထွန်းအောင်မြင်လျက်ရှိရာ ယခုနှစ်တွင် မိုးနေကြာ ပိုမိုအောင်မြင်စွာစိုက်ပျိုးနိုင်ရေးအတွက် အထွက်တိုးနေကြာမျိုးများသုံးစွဲစေရေး၊ ရာသီမှန်ကန်စွာနှင့် နေရာဒေသမှန်ကန်စွာစိုက်ပျိုးစေရေးနှင့် အောင်မြင်ဖြစ်ထွန်းစေရေး တောင်သူများ၊စိုက်ပျိုးရေးအဖွဲ့များပူးပေါင်းဆောင်ရွက်ကြရမှာဖြစ်ပါကြောင်း၊ စိုက်ပျိုး၊မွေးမြူရေးလုပ်ငန်းများအားအခြေခံပြီး  ဒေသမှ ထွက်ရှိသည့် ကုန်ကြမ်းများအား အသုံးပြု၍ ကုန်ထုတ်လုပ်မှုတိုးတက်မြင့်မားရေး၊ သွင်းကုန်အစားထိုးထုတ်လုပ်နိုင်ရေးနှင့် ပို့ကုန်တိုးတက်ထုတ်လုပ်နိုင်ရေးအတွက် Contract Farmingစနစ်၊ သမဝါယမအသင်းအဖွဲ့များ၊ လုပ်ငန်းရှင်များ၊ MSMEလုပ်ငန်းများ၊ တောင်သူများက ချိတ်ဆက်ဆောင်ရွက်ရမည်ဖြစ်ပါကြောင်း၊တစ်ဧကအထွက်နှုန်းပိုမိုထွက်ရှိရေးအတွက်  မျိုးကောင်းမျိုးသန့်စပါးများဖြင့် အစားထိုးစိုက်ပျိုးခြင်း၊ စိုက်ပျိုးနည်းစနစ်ပြောင်းလဲစိုက်ပျိုးခြင်းများ လုပ်ဆောင်ရမည်ဖြစ်ပြီး မြေဆီလွှာဖွံ့ဖြိုးတိုးတက်ရေးအတွက် ပိုက်ဆံလျှော်(သစ်စိမ်းမြေသြဇာ)ထည့်သွင်းစိုက်ပျိုးခြင်း၊ ထုံးထည့်သွင်းစိုက်ပျိုးခြင်း၊ သဘာဝမြေသြဇာနှင့်ဓါတ်မြေသြဇာများ အချိုးကျ သုံးစွဲကြရန်လိုကြောင်း၊ ဧရာဝတီတိုင်းဒေသကြီးအား စိုက်ပျိုးရေးစံပြတိုင်းဖြစ်ရန်အတွက် စိုက်ပျိုးရေးပညာရှင်များ၊ တောင်သူများကလည်း ပူးပေါင်းဆောင်ရွက်ရန်လိုပါကြောင်း၊တောင်သူများအနေဖြင့် တစ်ဧက(၁၀)တင်းနှုန်း ပိုမိုထွက်ရှိရေးအတွက် ဝိုင်းဝန်းဆောင်ရွက်ပေးကြရန်နှင့် စိုက်ပျိုးစွမ်းအား တိုးတက်မြင့်မားရေးအတွက် တစ်သီးမှနှစ်သီး၊ နှစ်သီးမှသုံးသီးအထိ ပိုမိုစိုက်ပျိုးပြီး စိုက်ပျိုးရေးစံပြတိုင်းဖြစ်အောင်  ဝိုင်း၀န်းကြိုးပမ်း ပေးကြစေလိုကြောင်းအမှာစကားပြောကြားသည်။ ယင်းနောက် တိုင်းဒေသကြီးဝန်ကြီးချုပ်က နိုင်ငံ့စီးပွားမြှင့်တင်ရေးရန်ပုံငွေ မတည်ထောက်ပံ့ငွေဖြင့် ဆောင်ရွက်သည့်  မျိုးစပါးနှင့် သွင်းအားစုများအား မြန်အောင်၊ကြံခင်း၊အင်္ဂပူမြို့နယ်များမှ တောင်သူများထံသို့လည်းကောင်း၊ မြန်အောင်ခရိုင်စီမံအုပ်ချုပ်ရေးအဖွဲ့ ဥက္ကဋ္ဌက ကျေးရွာဖွံ့ဖြိုးရေးစီမံကိန်း၊မြစိမ်းရောင်ကျေးရွာ စီမံကိန်းရန်ပုံငွေများအား မြန်အောင်၊ကြံခင်း၊အင်္ဂပူမြို့နယ်များမှ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌများထံသို့လည်းကောင်းလွှဲပြောင်းပေးအပ်ခဲ့သည်။ ဆက်လက်၍ မြန်အောင်မြို့နယ်အတွင်းရှိ ဌက်ကြီးကွင်းကျေးရွာ၊ညောင်ချဉ်ကျေးရွာ၊ကြံခင်းမြို့နယ်အတွင်းရှိ ကွေ့မကျေးရွာ၊ရှောက်ခုံကျေးရွာ၊အင်္ဂပူမြို့နယ်အတွင်းရှိ တလိုင်းကွင်းကျေးရွာ၊ထူးကြီးမြို့တို့မှ တောင်သူများက တစ်ဧက(၁၀)တင်းနှုန်း ပိုမိုတိုးတက်ထွက်ရှိရေးအတွက် ပြင်ဆင်ဆောင်ရွက်ထားရှိမှုများနှင့်မွေးမြူရေးလုပ်ငန်းဆောင်ရွက်နေမှုကို  တင်ပြဆွေးနွေးခဲ့ရာ တိုင်းဒေသကြီး ဝန်ကြီးချုပ်က  ဖြည့်စွက်ဆွေးနွေးခဲ့ပြီး တောင်သူများ၏ လိုအပ်ချက်တင်ပြမှုများအပေါ် သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့ကြောင်းသိရသည်။

ဧရာဝတီတိုင်းဒေသကြီး၂၀၂၃ခုနှစ်၊မိုးရာသီသစ်ပင်စိုက်ပျိုးပွဲအား ယနေ့နံနက်ပိုင်းက ပုသိမ်တက္ကသိုလ်ဝန်း၌ ကျင်းပခဲ့ရာ သစ်ပင်စိုက်ပျိုးပွဲသို့ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊အနောက်တောင်တိုင်းစစ်ဌာနချုပ် တိုင်းမှူးနှင့်ဇနီး၊ပုသိမ်လေတပ်စခန်းဌာနချုပ်မှူးနှင့်ဇနီး၊အစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ဌာနဆိုင်ရာများ၊ပုသိမ်တက္ကသိုလ်မှ ဆရာ၊ဆရာမများနှင့်ကျောင်းသား၊ကျောင်းသူများ၊လူမှုရေးအသင်းအဖွဲ့များ တက်ရောက်ခဲ့ကြသည်။ ၂၀၂၃ခုနှစ်၊မိုးရာသီသစ်ပင်စိုက်ပျိုးပွဲတွင် တိုင်းဒေသကြီးဝန်ကြီးချုပ်က“သစ်ပင်စိုက်ပျိုးပွဲ ကျင်းပရသည့် ရည်ရွယ်ချက်မှာ သဘာဝပတ်ဝန်းကျင် စိမ်းလန်းစိုပြည်ရေး၊ သန့်ရှင်းသောပတ်ဝန်းကျင်နှင့်ကောင်းမွန်သော ဂေဟစနစ် ထိန်းသိမ်းနိုင်ရေး၊ စိမ်းလန်းမြေ(Green Space) များ တိုးပွားလာစေရေးတို့အတွက် တိုင်းဒေသကြီးအနေဖြင့် မိုးရာသီသစ်ပင်စိုက်ပွဲတော် အခမ်းအနားများကို စံနမူနာပြု စိုက်ပျိုးကျင်းပရခြင်းပဲဖြစ်ပါကြောင်း၊မြန်မာနိုင်ငံသည် ရေမြေ/တောတောင်၊  သဘာဝသယံဇာတများပေါကြွယ်ဝသည့် နိုင်ငံဖြစ်သော်လည်း လူဦးရေတိုးပွားလာခြင်း၊ ရာသီဥတုများပုံမှန်မဟုတ်ဘဲ ဖောက်ပြန်လာခြင်း၊ မုန်တိုင်းများ တိုက်ခတ်ခြင်း၊ ရေကြီးခြင်း၊မြေပြိုခြင်းစသည့် အကြောင်းအရာများက သဘာဝသယံဇာတများကို လျော့နည်း လာစေပါကြောင်း၊ထိုကဲ့သို့ လျော့နည်းလာသည့် သဘာဝသယံဇာတများထဲ၌ သစ်တောသယံဇာတများလည်း ပါဝင်ပါကြောင်း၊ သဘာဝဘေးအန္တရာယ်များ ကာကွယ်နိုင်ရန် ပင်လယ်ကမ်းစပ်ဒေသများ၊ မြစ်ပေါက်ချောင်းပေါက်များတွင် ဒီရေတောစိုက်ပျိုးခြင်းများဆောင်ရွက်လျက်ရှိပြီးရှင်သန်စိမ်းလန်းလျက်ရှိပါကြောင်း၊ ထို့ပြင် လေကာပင်များဖြစ်သည့် အုန်းပင်၊ ထင်းရှူးပင်များကိုလည်း တစ်အုပ်တစ်မ စိုက်ပျိုးသွားကြရမှာဖြစ်ပါကြောင်း၊ အုန်းစိုက်ပျိုးခြင်းအား တစ်နိုင်တစ်ပိုင်စိုက်ပျိုးခြင်း၊ လေကာတန်းအဖြစ်တစ်အုပ်တစ်မစိုက်ပျိုးခြင်းများအပြင် စီးပွားဖြစ်စိုက်ပျိုးလျက်ရှိပြီး (အုန်းသီး) တန်ဖိုးကွင်းဆက်တစ်လျှောက် အဆင့်မြှင့်တင်ထုတ်လုပ်ခြင်းစီမံကိန်းအား အောင်မြင်စေရေးဆောင်ရွက်လျက်ရှိပါကြောင်း၊ ယခုနှစ်တွင် တိုင်းဒေသကြီးသစ်တောဦးစီးဌာနမှ နိုင်ငံပိုင် စိုက်ခင်းများအနေဖြင့် စီးပွားရေး စိုက်ခင်း (၂၅၀၀)ဧက၊ဒီရေတော စိုက်ခင်း (၂၄၀၀)ဧက၊ ကျေးရွာထင်းစိုက်ခင်း (၉၀၀)ဧက၊ စုစုပေါင်း (၅၈၀၀) ဧက စိုက်ပျိုးတည်ထောင်လျက်ရှိပါကြောင်း၊ ဒါ့အပြင် ၂၀၂၃ ခုနှစ် မိုးရာသီတွင် ခရိုင်/မြို့နယ်အသီသီးမှာ လူထုဖြန့်ပျိုးပင် (၁,၄၁၅,၈၀၀)ပင်ကို ဖြန့်ဝေစိုက်ပျိုးသွားမည်ဖြစ်ပြီး ၎င်းအပင်များထဲမှ မိုးရာသီအကြို သစ်ပင်စိုက်ပျိုးပွဲ(၁၈)ပွဲ(၁၇၇၂၀)ပင်၊ မိုးရာသီသစ်ပင်စိုက်ပျိုးပွဲ(၂၂)ပွဲ (၁၉၆၈၅)ပင်၊ စုစုပေါင်း သစ်ပင်စိုက်ပျိုးပွဲ (၄၀)ပွဲ (၃၆၉၀၅)ပင် စိုက်ပျိုးသွားမှာ ဖြစ်ပြီး ရှင်သန်အောင်မြင်အောင်ဆောင်ရွက်ကြရမှာဖြစ်ပါကြောင်း၊ သစ်တောသစ်ပင် စိုက်ပျိုးပြုစုထိန်းသိမ်းခြင်းများကို တိုင်းဒေသကြီးအတွင်း အရှိန်အဟုန်မြှင့် ဆောင်ရွက်နေသည့် ကာလအတွင်း နိုင်ငံပိုင်သစ်တောစိုက်ခင်းများ ရေရှည်တည်တံ့ရေး၊ ပင်လယ်ကမ်းရိုးတန်းဒီရေတောများဖွံ့ဖြိုးတိုးတက်ရေး၊ ရာသီဥတုပြောင်းလဲမှု လျှော့ချရေးနှင့် ပြန်လည်မျှတလာစေရေးစသည့် လုပ်ငန်းစဉ်တွေကို အမျိုးသားရေး တာဝန်တစ်ရပ်အနေဖြင့် ဒေသခံပြည်သူများ၊ ဌာနဆိုင်ရာများက ပူးပေါင်းဆောင်ရွက်ခြင်းဖြင့် “သစ်ပင်စိုက်ပွဲတော်များကျင်းပရင်း ဧရာဝတီတိုင်းဒေသကြီးကို စိမ်းလန်းသည့် တိုင်းဒေသကြီးအဖြစ် ဖန်တီးပုံဖော်ကြပါစို့”ဟု တိုက်တွန်းအမှာစကားများပြောကြားခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်ကဦးဆောင်၍ တာဝန်ရှိသူများသည် ကျွန်း၊ပျဉ်းကတိုး၊ပိတောက်၊မဟော်ဂနီအစရှိသည့် သစ်ပင်၊ ပန်းပင် ၁၈ မျိုးမှ ပျိုးပင်ပေါင်း (၁၅၅၅)ပင်အား စုပေါင်းစိုက်ပျိုးခဲ့ကြပြီးနောက် ဌာနဆိုင်ရာများနှင့် လူမှုရေးအသင်းအဖွဲ့များက စုပေါင်းသစ်ပင်စိုက်ပျိုးနေမှုများအား လှည့်လည်ကြည့်ရှုအားပေးခဲ့ပြီး ပိတောက်ဝါ ဆောင်နှင့် ချယ်ရီဆောင်များအတွက် ပိတောက်ပင်နှင့် ချယ်ရီပင််များ အမှတ်တရစိုက်ပျိုးခဲ့ကြကြောင်းသိရသည်။

ဧရာဝတီတိုင်းဒေသကြီးအတွင်း အလားအလာရှိသော ထုတ်ကုန်(အုန်းသီး)တန်ဖိုးကွင်းဆက်တစ်လျှောက် အဆင့်မြှင့်တင်ထုတ်လုပ်ခြင်းစီမံကိန်း စီးပွားဖြစ်အုန်းစိုက်ပျိုးထုတ်လုပ်ခြင်းနှင့် ကွင်းဆင်းသရုပ်ပြလေ့ကျင့်ခြင်းသင်တန်း တက်ရောက်နေသည့် သင်တန်းသားများနှင့်တွေ့ဆုံပွဲအား ယနေ့နံနက်ပိုင်းက မော်လမြိုင်ကျွန်းမြို့နယ်အထွေထွေအုပ်ချုပ်ရေးဦးစီးဌာန၊ မော်ဧရာခန်းမ၌ ပြုလုပ်ခဲ့ရာ တွေ့ဆုံပွဲသို့ တိုင်းဒေသကြီးဝန်ကြီးချုပ်ဦးတင်မောင်ဝင်း၊အစိုးရအဖွဲ့ဝင် ဝန်ကြီးများ၊ဌာနဆိုင်ရာများနှင့် သင်တန်းသား၊သင်တန်းသူများ တက်ရောက်ခဲ့ကြသည်။ တွေ့ဆုံပွဲတွင် တိုင်းဒေသကြီးဝန်ကြီးချုပ်က “ဧရာဝတီတိုင်းဒေသကြီးအတွင်းရှိ  အုန်းစိုက်ဧက၆သောင်းကျော် စိုက်ပျိုးထားရှိပြီး ကမ်းခြေဒေသများ၌ အများဆုံး စိုက်ပျိုးထားရှိပါကြောင်း၊အုန်းစိုက်ပျိုးရာမှ အုန်းသီး၊ အုန်းရည်၊ အုန်းဇံကြိုးနှင့် အုန်းခွံ လက်မှုပစ္စည်းများထုတ်လုပ်ခြင်းမှ အဆင့်မြှင့်တင်၍ လူသုံးကုန်ပစ္စည်းများ၊ စားသောက်ဖွယ်ရာများ၊ လက်မှုပစ္စည်းများထုတ်လုပ်လျက်ရှိပါကြောင်း၊အုန်းစိုက်ပျိုးခြင်းအား တစ်နိုင်တစ်ပိုင်စိုက်ပျိုးခြင်း၊ စီးပွားဖြစ်စိုက်ပျိုးခြင်းသာမက ‌သဘာဝေးအန္တရာယ်များကိုလည်း ကာကွယ်နိုင်သဖြင့် ကမ်းခြေဒေသများတွင် တစ်အုပ်တစ်မစိုက်ခင်းများ ထူထောင်စိုက်ပျိုးသွားရမည်ဖြစ်ပါကြောင်း၊ အုန်းစိုက်ပျိုးရာတွင်လည်းလည်း မိရိုးဖ လာစိုက်ပျိုးနည်းများအပြင် ကြားမြောင်းများတွင် ငါး၊ ပုဇွန် မွေးမြူခြင်းနှင့် ကြားသီးနှံထည့်သွင်းစိုက်ပျိုးကြပါကြောင်း၊ ယခုသင်တန်း တက်ရောက်လာသည့် သင်တန်းသား၊သင်တန်းသူများကလည်း သင်တန်းမှသင်ကြားပို့ချမှုများကိုစနစ်တကျ လိုက်နာမှတ်သား၍ အုန်းစိုက်ပျိုးခြင်းအား မိရိုးဖလာစိုက်ပျိုးနည်းများအပြင် ခေတ်မီစိုက်ပျိုးနည်းစနစ်များအသုံးပြုစိုက်၍ ဖြစ်ထွန်းအောင်မြင်အောင်စိုက်ပျိုးကြစေရေးနှင့် အုန်းသီး တန်ဖိုးကွင်းဆက်တစ်လျှောက် အဆင့်မြှင့်တင်ထုတ်လုပ်ခြင်းများအား အောင်မြင်အောင်ဆောင်ရွက်စေရေး”အမှာစကားပြောကြားသည်။ ဆက်လက်၍ တိုင်းဒေသကြီးစားသုံးသူရေးရာဦးစီးဌာနမှ ဒုတိယညွှန်ကြားရေးမှူးက သင်တန်းဖွင့်လှစ်ရခြင်းရည်ရွယ်ချက်များနှင့်ပတ်သက်၍ ရှင်းလင်းတင်ပြပြီးနောက် တိုင်းဒေသကြီးဝန်ကြီးချုပ်က နိဂုံးချုပ်အမှာစကားများ ပြောကြားခဲ့ပြီး အုန်းသီးဖြင့်ပြုလုပ်ထားသည့် လူသုံးကုန် ၊ အလှကုန်ပစ္စည်းများ၊လက်မှုပစ္စည်းများအား လှည့်လည်ကြည့်ရှုအားပေးခဲ့သည်။ ဆက်လက်၍ တိုင်းဒေသကြီး ဝန်ကြီးချုပ်သည် မော်လမြိုင်ကျွန်းမြို့နယ်၊ကညင်ချောင်းလေးကျေးရွာရှိ ဒေါ်တိုးတိုးလွင်၏ အုန်းသီးသရုပ်ပြစိုက်ခင်းအား သင်တန်းသား၊ သင်တန်းသူများ နှင့်အတူ ကွင်းဆင်းလှည့်လည်ကြည့်ရှုစစ်ဆေးခဲ့ပြီး သိရှိလိုသည်များကို မေးမြန်းခဲ့ရာ တာဝန်ရှိသူများက ပြန်လည်ဖြေကြားခဲ့သည်။ ယင်းနောက် တိုင်းဒေသကြီးဝန်ကြီးချုပ်သည် ကညင်ချောင်းလေးကျေးရွာ အခြေခံပညာအလယ်တန်းကျောင်းသို့ သွားရောက်၍ ဆရာ၊ဆရာများနှင့်တွေ့ဆုံခဲ့ပြီး ဆရာ၊ဆရာမများက ကျောင်းတွင်းလိုအပ်ချက်များကို တင်ပြကြရာ တိုင်းဒေသကြီး ဝန်ကြီးချုပ်က သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့ပြီး ထောက်ပံ့ငွေများပေးအပ်ခဲ့သည်။  အဆိုပါ အလားအလာရှိသော ထုတ်ကုန်(အုန်းသီး)တန်ဖိုးကွင်းဆက်တစ်လျှောက် အဆင့်မြှင့်တင်ထုတ်လုပ်ခြင်းစီမံကိန်း စီးပွားဖြစ်အုန်းစိုက်ပျိုးထုတ်လုပ်ခြင်းနှင့် ကွင်းဆင်းသရုပ်ပြလေ့ကျင့်ခြင်းသင်တန်းအား ယခုလ ၈ရက်နေ့မှ ၁၀ရက်နေ့အထိပြုလုပ်သွားမှာဖြစ်ပြီး သင်သန်းသား၊သင်တန်းသူ (၃၀)ဦးတက်ရောက်လျက်ရှိရာ ဧရာဝတီတိုင်းဒေသကြီးအတွင်း အလားအလာရှိသောထုတ်ကုန်(အုန်းသီး) တန်ဖိုးကွင်းဆက်တစ်လျှောက် အဆင့်မြှင့်တင်ထုတ်လုပ်ခြင်းစီမံကိန်း စီးပွားဖြစ်အုန်းစိုက်ပျိုးထုတ်လုပ်ခြင်းလုပ်ငန်းများ အောင်မြင်စေရေး အကောင်အထည်ဖော်ဆောင်ရွက်လျက်ရှိကြောင်းသိရသည်။

ဧရာဝတီတိုင်းဒေသကြီး၊ မအူပင်မြို့၌ ယမန်နေ့ညနေပိုင်းက ငလျင်လှုပ်ခတ်မှုဖြစ်ပွားခဲ့သောကြောင့် အမှတ်(၃) ရပ်ကွက်ရှိ ရွှေဘုန်းမြင့်စေတီတော်မြတ်ကြီး၏ စိန်ဖူးတော်မြေခခြင်း၊ စေတီတော်မြတ်ကြီးအနီးရှိ မိုးကုတ်ဝိပဿနာတရားစခန်းရှိ တရားရိပ်သာ ဆန်းရှိတ်နှင့် ကျောက်ထုတ် ပြိုကျခြင်း၊မအူပင်တက္ကသိုလ်ရှိ ဘွဲ့နှင်းသဘင်ဆောင်၊ (၃)ထပ် စာသင်ဆောင် (Lဆောင်)များ ထိခိုက်ပျက်စီးခဲ့ခြင်းကြောင့် အဆိုပါနေရာများသို့ တိုင်းဒေသကြီးဝန်ကြီးချုပ်ဦးတင်မောင်ဝင်းသည် အစိုးရအဖွဲ့အဖွဲ့ဝင် ဝန်ကြီးများ၊တာဝန်ရှိသူများနှင့်အတူ ယနေ့နံနက်ပိုင်းက သွားရောက်ကြည့်ရှုစစ်ဆေးခဲ့သည်။ ရှေးဦးစွာ တိုင်းဒေသကြီးဝန်ကြီးချုပ်နှင့် တာဝန်ရှိသူများသည် မအူပင်တက္ကသိုလ်သို့ သွားရောက်၍ ငလျင်ဒဏ်ကြောင့် ပျက်စီးမှုများရှိခဲ့သည့် ဘွဲ့နှင်းသဘင်ခန်းမဆောင်တွင် မြေညီထပ်ရှိနံရံများ အက်ကွဲပျက်စီးခြင်း၊ဒုတိယထပ်ရှိ ဆောက်လုပ်ရေးအဆက်နေရာရှိတိုင်နှင့်ယက္မများပျက်စီးခြင်း ၊တတိယထပ်ရှိ ကွန်ကရစ်တိုင်နှင့် နံရံပျက်စီးခြင်း၊ မျက်နှာကြက်များပျက်စီးခြင်းများနှင့် ၃ထပ်စာသင်ဆောင်(Lဆောင်)တွင် ဆင်ဝင်ရှိကွန်ကရစ်တိုင်တစ်တိုင်နှင့် ညာဘက်အစွန်ရှိကွန်ကရစ်တိုင် နှစ်တိုင်ပျက်စီးခြင်း၊ ‌မြေညီထပ်ရှိနံရံများ၏ plasterများ ပျက်စီးနေခြင်းများအားကြည့်ရှုစစ်ဆေးခဲ့ပြီး ပြန်လည်ပြုပြင်ရေးလုပ်ငန်းများဆောင်ရွက်နိုင်ရန် ထိခိုက်မှုများအား တိုင်းတာစစ်ဆေးမှုများဆောင်ရွက်ရန်၊ ဘွဲ့နှင်းသဘင်ဆောင်အတွင်းရှိ ပရိဘောဂပစ္စည်းများအား အနည်းဆုံးအင်အားနှင့်ပြောင်းရွှေ့ဆောင်ရွက်ထားရန်၊ ထိခိုက်မှုရှိခဲ့သည့် အဆောင်များမှ ရုံးခန်းများ၊ စာသင်ခန်းများပြောင်းရွှေ့ဖွင့်လှစ်သင်ကြားနိုင်ရေးဆောင်ရွက်ရန်၊ (၃) ထပ်ဆောင်ထိခိုက်ခဲ့သည့်နေရာများသို့ သွားလာမှုမရှိစေရေးဆောင်ရွက်ရန်နှင့် တက္ကသိုလ်ပုံမှန်ဖွင့်လှစ်သင်ကြားနိုင်ရေး ဝိုင်းဝန်းဆောင်ရွက်ကြရန်မှာကြားခဲ့သည်။ အလားတူ တိုင်းဒေသကြီးဝန်ကြီးချုပ်နှင့် တာဝန်ရှိသူများသည် ရွှေဘုန်းမြင့်စေတီတော်မြတ်ကြီးအနီးရှိ မိုးကုတ်ဝိပဿနာတရားစခန်းရှိ၊တရားနာဆောင်ဆန်းရှိတ်နှင့် ကျောက်ထုတ်ပြိုကြမှုနှင့် ရှင်းလင်းဆောင်ရွက်နေမှုများအား ကြည့်ရှုစစ်ဆေးခဲ့ပြီး အဆောက်အဦခိုင်ခံ့မှုအားတိုင်းတာစစ်ဆေး၍ ပြန်လည်ပြုပြင်နိုင်ရေးလုပ်ငန်းများဆောင်ရွက်ရန်မှာကြားခဲ့ပြီး သီလရှင်ဆရာကြီးများအား ဖူးမြော်ကြည်ညို၍ အလှူငွေများနှင့် စားသောက်ဖွယ်ရာများ ဆက်ကပ်လှူဒါန်းခဲ့သည်။ယင်းနောက် ရွှေဘုန်းမြင့်စေတီတော်ကြီးသို့ သွားရောက်၍  ရုပ်ပွားတော်မြတ်ကြီးအား ပန်း၊ရေချမ်း၊ဆီမီးများကပ်လှူပူဇော်ဖူးမြော်ကြည်ညိုခဲ့ပြီးနောက် ငလျင်လှုပ်ခတ်မှုကြောင့် မြေခခဲ့သည့် စိန်ဖူးတော်အားဖူးမြော်ခဲ့ကာ စိန်ဖူးတော်ပြန်လည်တင်လှူပူဇော်နိုင်ရေး ပေါင်းစပ်ညှိနှိုင်းဆောင်ရွက်ပေးခဲ့ကြောင်းသိရသည်။

ဧရာဝတီတိုင်းဒေသကြီးအစိုးရအဖွဲ့ရုံး အစည်းအဝေးခန်းမ(၁)၌ သွေးလွန်တုပ်ကွေးရောဂါကြိုတင်ကာကွယ်နိုင်ရေး လုပ်ငန်းညှိနှိုင်းအစည်းအဝေးကို ယခုလ ၇ ရက်နေ့ ညနေပိုင်းက ပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်း၊ တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီး ကုသရေးနှင့် ပြည်သူ့ကျန်းမာရေးဦးစီးဌာနမှူးနှင့် တာဝန်ရှိသူများ၊ မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့၊ အမျိုးသမီးရေးရာအဖွဲ့၊ လူမှုရေးအသင်းအဖွဲ့များ၊ဌာနဆိုင်ရာများနှင့်  ခရိုင်အုပ်ချုပ်ရေးမှူးများမှ Video Conferencing စနစ်ဖြင့် တက်ရောက်ခဲ့ကြသည်။ ရှေးဦးစွာ တိုင်းဒေသကြီးဝန်ကြီးချုပ်မှ  “သွေးလွန်တုပ်ကွေးရောဂါသည် နှစ်စဉ်ကျောင်းဖွင့်ကာလမတိုင်မီဖြစ်ပွားလေးရှိသည်ကိုတွေ့ရှိရပါကြောင်း၊ အခြေခံပညာကျောင်းများ ပြန်လည်ဖွင့်လှစ်ချိန်တွင် ကျောင်းသား ၊ကျောင်းသူများနှင့် ပြည်သူများသွေးလွန်တုပ်ကွေး ရောဂါဖြစ်ပွားမှု မရှိစေရေးကြိုတင် ကာကွယ်ရန် အတွက် ရပ်ကွက်၊ ကျေးရွာများ၊ ကျောင်းပတ်ဝန်းကျင် သန့်ရှင်းရေး၊ရေစီးရေလာကောင်း မွန်စေရေး၊ ခြုံ နွယ်များရှင်းလင်းခြင်း၊ ဖုံး၊ သွန်၊ လဲ၊ စစ် လုပ်ငန်းများ၊ အဘိတ်ဆေးခတ်ခြင်းလုပ်ငန်း များကို အလေးထား တိုက်တွန်းဆောင်ရွက်ခဲ့ပါကြောင်း၊ သွေးလွန်တုပ်ကွေးရောဂါကြိုတင် ကာကွယ်ရေး လုပ်ငန်းများတွင် ဌာနဆိုင်ရာများ၊ မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့၊ အမျိုးသမီးရေးရာအဖွဲ့၊ လူမှုရေးအသင်းအဖွဲ့များ၊ ပြည်သူများ၊  ပူးပေါင်းပါဝင်ဆောင်ရွက်ကြရမှာဖြစ်ပါကြောင်း၊ သွေးလွန်တုပ်ကွေးရောဂါကြိုတင်ကာကွယ်ရေးအသိပညာပေးခြင်းလုပ်ငန်းများ ထိထိရောက်ရောက်ဆောင်ရွက်ကြရန်လိုအပ်ကြောင်း၊ သွေးလွန်တုပ်ရောဂါဖြစ်ပွားလာခဲ့ပါက အချိန်မီသတင်းပို့နိုင်ရေး၊ ကုသနိုင်ရေးနှင့် ဖြစ်ပွားခဲ့သည့်နေရာများအား သွေးလွန်တုပ်ကွေးရောဂါကာကွယ်ရေးဆိုင်ရာလုပ်နည်းများနှင့်အညီ ရှင်းလင်းဆောင်ရွက်ခြင်းလုပ်ငန်းများစနစ်တကျဆောင်ရွက်ကြရန် လိုပါကြောင်း၊ သွေးလွန်တုပ်ကွေးရောဂါကာကွယ်နှိမ်နှင်းရေးလုပ်ငန်းများအား လူထုလှုပ်ရှားမှုဖြင့် အင်တိုက်အားတိုက်ဆောင်ရွက်ကြရန်နှင့် ခရိုင်များအလိုက် သွေးလွန်တုပ်ကွေးရောဂါကာကွယ်နှိမ်နှင်းရေးနှင့်ပတ်သက်၍ ကြိုတင်ဆောင်ရွက်ထားရှိမှုများနှင့်ဆက်လက်ဆောင်ရွက်မည့်အစီအစဉ်များရှင်းလင်းတင်ပြကြရန်နှင့် လိုအပ်သည်များတင်ပြပေးကြရန်”မှာကြားဆွေးနွေးခဲ့သည်။ ဆက်လက်၍ ကုသရေးနှင့် ပြည်သူ့ကျန်းမာရေးဦးစီးဌာန တိုင်းဒေသကြီးဦးစီးမှူး ဒေါက်တာဇော်မင်းထွန်းက သွေးလွန်တုပ်ကွေးရောဂါ ဖြစ်ပွားမှုအခြေအနေနှင့် ကြိုတင်ကာကွယ်ရေးလုပ်ငန်းများ ဆောင်ရွက်ထားရှိမှုအခြေအနေများအားလည်းကောင်း၊ ခရိုင်အုပ်ချုပ်ရေးမှူးများမှ ခရိုင်အလိုက် သွေးလွန်တုပ်ကွေးရောဂါ ဖြစ်ပွားမှုအခြေအနေနှင့် ကြိုတင်ကာကွယ်ရေးလုပ်ငန်းများ ဆောင်ရွက်ထားရှိမှုအခြေအနေများအား ရှင်းလင်းတင်ပြခဲ့ပြီး အစည်းအဝေးသို့တက်ရောက်လာသောကြသူများမှ ဝိုင်းဝန်းဆွေးနွေးခဲ့ကာ တိုင်းဒေသကြီးဝန်ကြီးချုပ်က ရပ်ကွက်၊ ကျေးရွာများ၊ စာသင်ကျောင်းများ၊ မူလတန်းကြိုကျောင်းများပါ ရေစီးရေလာကောင်းမွန်စေရေး၊ ဖုံး၊ သွန်၊ လဲ၊ စစ်၊ လုပ်ငန်းများဆောင်ရွက်ခြင်း၊ အဘိတ်ဆေးခတ်ခြင်းများဆောင်ရွက်ခြင်း၊ သန့်ရှင်းရေးလုပ်ငန်းများအား မြန်မြန်ထက်ထက်ဆောင်ရွက်စေရန်၊ ပညာပေးလုပ်ငန်းများ၊ လက်ကမ်းစာစောင်ဖြန့်ဝေခြင်းများ ကျယ်ကျယ်ပြန်ပြန့်ဆောင်ရွက်ရန်နှင့် လိုအပ်သည်များကိုဖြည့်စွက်မှာကြားခဲ့ကြောင်းသိရသည်။