ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် တာဝန်ရှိသူများနှင့်အတူ  ယနေ့နံနက်ပိုင်းက  ပုသိမ်မြို့ပေါ်ရှိဌာနဆိုင်ရာများအနေဖြင့် ပြည်သူ့အကျိုးပြုလုပ်ငန်းများ  ဆောင်ရွက်နေသည့် ခြုံနွယ်များခုတ်ထွင်ရှင်းလင်းခြင်း၊ ရေစီးရေလာကောင်းမွန်ရေးအတွက် ရေမြောင်းများ တူးဖော်ခြင်းအစရှိသည့် လုပ်ငန်းများအား တပ်ရင်းတပ်ဖွဲ့များ၊ ဌာနဆိုင်ရာများ၊ ပြည်သူများပူးပေါင်းဆောင်ရွက်နေမှုများကို လှည့်လည်ကြည့်ရှုစစ်ဆေးခဲ့သည်။ ရှေးဦးစွာ တိုင်းဒေသကြီးဝန်ကြီးချုပ်သည် ပုသိမ်တက္ကသိုလ် ဓမ္မာရုံအတွင်း၌ နယ်မြေခံတပ်ရင်းတပ်ဖွဲ့များ၊ ဌာနဆိုင်ရာများနှင့်ပြည်သူများပူပေါင်း၍ ပေါင်းမြက်များ ရှင်းလင်းခြင်း၊ ခြုံနွယ်များခုတ်ထွင် ရှင်းလင်းနေများကိုကြည့်ရှုစစ်ဆေးခဲ့သည်။ ယင်းနောက် တိုင်းဒေသကြီးဝန်ကြီးချုပ်သည် ရေစီးရေလာကောင်းမွန်စေရေး တလိုင်းချောင်း ရေမြောင်းဘ တူးဖော်ခြင်း၊ အမှိုက်များဆယ်ယူခြင်းနှင့် ဗိုလ်ဘဌေးလမ်းရှိ လမ်းဘေးရေမြောင်း တူးဖော်ခြင်းနှင့်အမှိုက်များဆယ်ယူနေမှုများကို ဆက်လက်ကြည့်ရှုစစ်ဆေးပြီး ရေမြောင်းများနှင့် ချောင်းများရေစီးရေလာကောင်းမွန်စေရေး၊ ရေမြောင်းများ၊ ချောင်းများအတွင်း ပြည်သူများ အနေဖြင့် စည်းကမ်းမဲ့အမှိုက်များ စွန့်ပစ်မှုမရှိစေရေးအတွက် အသိပညာပေးခြင်း၊ ဒဏ်ရိုက်ခြင်းများ ဆောင်ရွက်ရန်နှင့်  ချောင်းများ၊ ရေမြောင်းများ တိမ်ကောပျက်စီးမှုမရှိစေရန် ဝိုင်းဝန်းထိန်းသိမ်း စောင့်ရှောက်ရေးတို့ကို မှာကြားခဲ့သည်။  ဆက်လက်၍ တိုင်းဒေသကြီးဝန်ကြီးချုပ်သည် ပုသိမ်-ငပုတောကားလမ်းဘေး၊ ပေါက်ကုန်းကျေးရွာအုပ်စုရှိ MSMEsလုပ်ငန်းဖြစ်သည့် ရွှေပျား ပဲငံပြာရည်နှင့် ငရုတ်ဆီစက်ရုံသို့ သွားရောက်ကြည့်ရှု အားပေးရာ စက်ရုံတာဝန်ရှိပိုင်ရှင်မှ တိုင်းဒေသကြီးအတွင်းမှထွက်ရှိသည့် ကုန်ကြမ်းများဖြစ်သည့် ငရုတ်၊ ကလောမှုန့်၊ သကြား၊ ဆား များအသုံးပြု၍ စက်ရုံမှထုတ်လုပ် လျက်ရှိသော ငရုတ်ဆီ၊ ခရုဆီ၊ ရှာလကာရည်၊ ပဲငပိ၊ ပဲငံပြာရည် (အကြည်/အနောက်) ထုတ်လုပ်ပုံအဆင့်ဆင့်နှင့် ကုန်ကြမ်းသိုလှောင် ထားရှိမှု၊ကုန်ကြမ်းများဝယ်ယူရရှိမှု၊ အသုံးချမှု တို့အား ရှင်းလင်းတင်ပြခဲ့မှုအပေါ် တိုင်းဒေသကြီးဝန်ကြီးချုပ်က စားသောက်ကုန်ပစ္စည်းများ ထုတ်လုပ်ရာတွင် အဆင့်မီစက်ပစ္စည်းများ အသုံးပြုထုတ်လုပ်နိုင်သဖြင့် လုပ်ငန်းခွင်အန္တရာယ် ကင်းရှင်းပြီး ကျန်းမာရေးနှင့်ညီညွတ်မျှတစေမည်ဖြစ်ပါကြောင်း၊ ထုပ်ပိုးမှုစနစ် ပိုမိုကောင်းမွန်ပြီး ဈေးကွက် ပိုမိုရရှိစေရေး ကြိုးစားဆောင်ရွက်ရန် လမ်းညွှန်မှာကြားခဲ့သည်။ ရွှေပျား ပဲငံပြာရည်နှင့် ငရုတ်ဆီစက်ရုံမှ တစ်နှစ်လျှင် ငရုတ်ဆီ ၁၀တန်၊ ပဲငံပြာရည်(အနောက်) ၉တန်၊ ပဲငံပြာရည်(အကြည်) ၂တန်၊ ခရုဆီ ၀.၅တန်၊ ကြက်သွန်ဖြူငရုတ်ဆီ ၁.၅တန်၊ ရှာလကာရည် ၂တန်နှင့် ပဲငပိ ၀.၅တန်အား တိုင်းဒေသကြီးအတွင်းနှင့် အခြားတိုင်းနှင့်ပြည်နယ်များသို့ ဖြန့်ဖြူးရောင်းချလျက်ရှိကြောင်းသိရသည်။ ဆက်လက်၍ တိုင်းဒေသကြီးဝန်ကြီးချုပ်သည် ရွှေမြင်တင်ကျေးရွာအုပ်စု၊ ရွာသာယာကျေးရွာရှိ ဦးဇင်အောင် ၏ မျိုးဝက်မနှင့်အသားတိုးဝက်မွေးမြူရေးခြံတွင် မျိုးဝက်မ (၂၀)ကောင်၊ အသားတိုးဝက် (၁၂၀)ကောင်၊ မျိုးဝက်သိုး (၂)ကောင် မွေးမြူထားရှိမှုနှင့် ဦးသိန်းဝင်း၏ တစ်နိုင်တစ်ပိုင် ဥစားကြက် (၁၀၀၀)၊ မျိုးဝက်မ (၁၀)ကောင်နှင့် အသားတိုးဝက် (၁၅)ကောင် မွေးမြူထားရှိမှုများအား သွားရောက်ကြည့်ရှုစစ်ဆေးခဲ့ပြီး ခြံပိုင်ရှင်များ၊ မွေးမြူရေးနှင့်ကုသရေး ဦးစီးဌာန တိုင်းဦးစီးမှူးက အသားတိုးဝက်ပေါက်များမွေးမြူမှု အခြေအနေများ၊ ဈေးကွက်ဝင် အသားတိုးဝက်များအား ဈေးကွက်အတွင်းသို့ဖြန့်ဖြူးရောင်းချရန် စီစဉ်ဆောင်ရွက်နေမှုနှင့် မေထုန်မဲ့မျိုးပွား နိုင်ရေးဆောင်ရွက်နေမှုအခြေအနေများ ရှင်းလင်းတင်ပြခဲ့ရာ တိုင်းဒေသကြီး ဝန်ကြီးချုပ်မှ ဇီဝလုံခြုံရေးလုပ်ငန်းများအလေးထားဆောင်ရွက်ရန်၊ ထုတ်လုပ်မှုကုန်ကျစရိတ်များ လျော့ချနိုင်ရေးဆောင်ရွက်ရန်၊ စွန့်ပစ်ပစ္စည်းများမှ ဇီဝမြေဩဇာအဖြစ်ပြန်လည်အသုံးပြု နိုင်စေရေးနှင့် တိရစ္ဆာန်အစာစက်ရုံတည်ဆောက်နိုင်ရေး ကြိုးစားဆောင်ရွက်ရန် မှာကြားခဲ့ပြီး မွေးမြူရေးလုပ်ငန်းသုံးခြံဖြန်းပိုးသတ်ဆေးများပံ့ပိုးပေးခဲ့ကြောင်းသိရသည်။

ဧရာဝတီတိုင်းဒေသကြီးအတွင်းရှိ စစ်မှုထမ်းဟောင်းအဖွဲ့ဝင်များ၏ သား/သမီးများအား ပညာသင်ထောက်ပံ့ငွေ၊ စာရေးကိရိယာများနှင့် ရိက္ခာအမယ်လေးမျိုး ထောက်ပံ့ပေးအပ်ခြင်း အခမ်းအနားကို ယနေ့နံနက်ပိုင်းက အနောက်တောင်တိုင်းစစ်ဌာနချုပ် ဧရာဝတီခန်းမ၌ ပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အနောက်တောင်တိုင်း စစ်ဌာနချုပ်တိုင်းမှူး၊ တိုင်းဒေသကြီး အစိုးရအဖွဲ့ဝင်ဝန်ကြီးများ၊ စစ်မှုထမ်းဟောင်းအဖွဲ့ဝင်များ၊ ဆရာ၊ဆရာမများနှင့် ကျောင်းသား၊ ကျောင်းသူများ တက်ရောက်ခဲ့ကြသည်။ အခမ်းအနားတွင် တိုင်းဒေသကြီးဝန်ကြီးချုပ် ဦးတင်မောင်ဝင်းက“ ယနေ့ အခမ်းအနားသည် တိုင်းဒေသကြီးအတွင်းရှိ စစ်မှုထမ်းဟောင်းအဖွဲ့ဝင်များ၏ သား/သမီး များအား ပညာသင်ထောက်ပံ့ငွေ၊ စာရေးကိရိယာများနှင့် ရိက္ခာအမယ်လေးမျိုး ထောက်ပံ့ပေးအပ်ခြင်းဖြစ်ပါကြောင်း၊ တိုင်းဒေသကြီးအစိုးရအဖွဲ့အနေဖြင့် စစ်မှုထမ်းဟောင်းများ၏ စားဝတ်နေရေးနှင့် သား/ သမီးများ၏ ပညာရည်မြှင့်တင်မှု လုပ်ငန်းများကိုလည်း အလေးထားဖြည့်ဆည်းဆောင်ရွက်ပေးလျက်ရှိပါကြောင်း၊ နိုင်ငံတစ်နိုင်ငံမှာလည်း သဘာဝ သယံဇာတမည်မျှပင် ပေါကြွယ်ဝပါစေ  လူသားအရင်းအမြစ်ကြွယ်ဝမှုမရှိပါက နိုင်ငံဖွံ့ဖြိုး တိုးတက်မှုကို ကောင်းမွန်စွာဆောင်ရွက်နိုင်စွမ်းမရှိသည်ကိုတွေ့ရှိရမှာ ဖြစ်ပါကြောင်း၊ ထို့ကြောင့် ယနေ့နိုင်ငံအသီးသီးတွင် လူသားအရင်းအမြစ်ပေါကြွယ်ဝစေရန်  မျိုးဆက်သစ်လူငယ်များ အတွက် ပညာရေးကဏ္ဍကို အထူးမြှင့်တင်ဆောင်ရွက်ပေးနေကြသည်ကို လေ့လာတွေ့ရှိ ရပါကြောင်း၊  ယနေ့လူငယ်များဖြစ်သည့် မောင်မယ်တို့သည် အနာဂတ် နိုင်ငံတော်ကို ဖန်တီးပုံဖော်ကြမည့်မျိုးဆက်သစ်များ ဖြစ်ပါကြောင်း၊ ထို့ကြောင့် ခေတ်မီဖွံ့ဖြိုး တိုးတက်သည့် အနာဂါတ်နိုင်ငံတော်ကို ပုံဖော်ရာတွင် တိုင်းပြည်၏ ပညာရေးတိုးတက် မြင့်မားရေးသည် အဓိကကျသည့်အခန်းကဏ္ဍတွင် ပါဝင်လျက်ရှိပါကြောင်း၊  ပညာရေးတိုးတက် မြင့်မားရန် အတွက် မျိုးဆက်သစ်ကျောင်းသား/ ကျောင်းသူများအနေဖြင့် ပညာကို အပတ်တကုတ် ကြိုးစားသင်ယူသွားကြဖို့ လိုအပ်မှာဖြစ်ပါကြောင်း၊ ထို့အပြင် မိဘများအနေဖြင့်လည်း ကလေးများစာတတ်ဖို့ ကျောင်းမှာဘဲ တာဝန်ရှိသည်ဟူသော အသိမျိုးမထားဘဲ “မိဘဆရာ ပူးပေါင်း ကလေးပညာကောင်း”  ဆိုသည်နှင့်အညီ သက်ဆိုင်ရာ ဆရာ/ ဆရာမများနှင့် ပူးပေါင်းပြီး မိမိတို့ သား/သမီးများ၏ အားနည်းချက် လိုအပ်ချက်များကို ပြုပြင်ဖြည့်ဆည်း ဆောင်ရွက်ပေးဖို့လိုအပ်ပါကြောင်း၊ ပညာသင်ယူသည့်အခါ ထက်သန်သည့် ဝီရိယနှင့် မျိုးချစ်စိတ်ဓာတ်တို့ပေါင်းစပ်လိုက်ပါက တို့နိုင်ငံသည် အချိန်တိုအတွင်း ဖွံ့ဖြိုးတိုးတက် နေသည့် ကမ္ဘာ့နိုင်ငံများနှင့် ရင်ဘောင်တန်းနိုင်မည်ဖြစ်ပါကြောင်း၊ နိုင်ငံတော်၏မျိုးဆက်သစ် များဖြစ်သည့် မောင်တို့မယ်တို့သည် ဘက်စုံထူးချွန်လူငယ်များအဖြစ် ယခုကတည်းက အနာဂတ်ကို မျှော်တွေးပြီး အစစအရာရာ ကြိုးပမ်းအားထုတ်လေ့လာဆည်းပူးကြရန် အလေး အနက်ထား တိုက်တွန်းမှာကြားလိုပါကြောင်း”အမှာစကားပြောကြားသည်။ ဆက်လက်၍ တိုင်းဒေသကြီးဝန်ကြီးချုပ်က ပညာသင်ထောက်ပံ့ငွေများကို ပေးအပ်ရာ တိုင်းဒေသကြီး စစ်မှုထမ်းဟောင်း ဥက္ကဌကလည်းကောင်း၊ စစ်မှုထမ်းဟောင်း အဖွဲ့ဝင်များ အတွက် ရိက္ခာအမယ်လေးမျိုးအားပေးအပ်ရာ အရန်စစ်မှုထမ်းဟောင်းအဖွဲ့ဝင် အမျိုးသမီး တစ်ဦးကလည်းကောင်း၊ အနောက်တောင်တိုင်း စစ်ဌာနချုပ်တိုင်းမှူးက မူလတန်းအဆင့် ကျောင်းသား၊ ကျောင်းသူများအတွက် စာရေးကိရိယာများ ပေးအပ်ရာ ကျောင်းသူတစ်ဦး ကလည်းကောင်း၊ အလယ်တန်းအဆင့်နှင့် အထက်တန်းအဆင့် ကျောင်းသား၊ ကျောင်းသူများ အတွက် စာရေးကိရိယာများပေးအပ်ရာ ကျောင်းသားတစ်ဦးကလည်းကောင်း လက်ခံရယူခဲ့ ကြသည်။ ယင်းနောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် အနောက်တောင်တိုင်းစစ်ဌာနချုပ် တပ်မတော်နယ်လှည့်ဆေးကုသရေးအဖွဲ့ ပုသိမ်တပ်နယ်မှ စစ်မှုထမ်းဟောင်းအဖွဲ့ဝင်များနှင့်မိသားစုဝင်များအား ကျန်းမာရေးစောင့်ရှောက်ပေးနေမှုများကို ကြည့်ရှုအားပေးခဲ့သည်။ အဆိုပါ အခမ်းအနားတွင် တိုင်းဒေသကြီးအစိုးရအဖွဲ့က တိုင်းအတွင်းရှိ စစ်မှုထမ်းဟောင်း အဖွဲ့ဝင်များအတွက် ဆန်အိတ် (၂၀၀)၊ ဆီ(၂၀၀)ပိဿာ၊ ပဲ(၃၀၀)ပိဿာ၊ ဆား(၁၀၀) ပိဿာနှင့် ငွေကျပ်သိန်း(၂၁၀)အားလည်းကောင်း၊ အနောက်တောင်တိုင်း စစ်ဌာနချုပ်က စစ်မှုထမ်းဟောင်း အဖွဲ့ဝင်များ၏ သား/သမီးများအတွက်  ဗလာစာအုပ်(၃၈၉)ဒါဇင်၊ ခဲတံ (၂၈၄၉) ချောင်း၊ ခဲဖျက်(၇၇၉)ခု၊ ပေတံ(၇၇၉)ချောင်းနှင့် ဘောပင် (၂၆၈၆) ချောင်းကို ထောက်ပံ့ပေးအပ်နိုင်ခဲ့ ကြောင်းသိရသည်။

ဧရာဝတီတိုင်းဒေသကြီးဝန်ကြီးချုပ်သည် အစိုးရအဖွဲ့ဝင်ဝန်ကြီးများနှင့်အတူ နေ့လယ်ပိုင်းတွင် ပုသိမ်မြို့၊ ဧရာရွှေဝါခန်းမ၌ပြုလုပ်သည့် နိုင်ငံ့စီးပွားမြှင့်တင်ရေးရန်ပုံငွေ (၈၆)ဘီလီယံဖြင့် ၂၀၂၃ခုနှစ်၊ မိုးစပါးစီမံကိန်းတွင် ပါဝင်ဆောင်ရွက်ကြမည့် ဝယ်ယူကြိတ်ခွဲ တင်ပို့သူများ၊ သွင်းအားစုကုမ္ပဏီများနှင့် တွေ့ဆုံပွဲအခမ်းအနားသို့ တက်ရောက်ခဲ့ကြသည်။ ရှေးဦးစွာ တိုင်းဒေသကြီးဝန်ကြီးချုပ်က  “၂၀၂၂-၂၀၂၃ ခုနှစ်၊ နွေစပါးစိုက်ရာသီတွင် နိုင်ငံ့စီးပွားမြှင့်တင်ရေးရန်ပုံငွေ (၈၆)ဘီလီယံရရှိခဲ့ပြီး နွေစပါးနှင့် ပဲတီစိမ်းစိုက်ပျိုးရန်အတွက် တောင်သူများထံသို့ သွင်းအားစုများထောက်ပံ့ပေးခဲ့ပါကြောင်း၊ သွင်းအားစုများ ထောက်ပံ့ပေးနိုင်ခဲ့သည့်အတွက် နွေစပါးနှင့်ပဲတီစိမ်းများ အထွက်နှုန်းအထိုက် အလျောက် တိုးတက်မှုများရှိခဲ့ပါကြောင်း၊ အထွက်နှုန်းများ တိုးတက်ရန်အတွက်  မျိုး၊ မြေ၊ ရေ၊ နည်း စနစ်တကျအကောင်အထည်ဖော်ဆောင်ရွက်ကြရမှာ ဖြစ်ပါကြောင်း၊ သွင်းအားစုများအပြည့်အဝထည့်သွင်းနိုင်ရေးအတွက် တောင်သူများလက်ဝယ် အချိန်မီရောက်ရှိစေရေးစီမံဆောင်ရွက်ကြရန်၊ ပြီးခဲ့သည့်နွေစပါးစိုက်ရာသီနိုင်ငံ့စီးပွားမြှင့်တင်ရေး ရန်ပုံငွေ (၈၆)ဘီလီယံထောက်ပံ့ ဆောင်ရွက်ရာတွင်ကြုံတွေ့ရသည့်အားနည်းချက်၊ အားသာချက် များကိုနမူနာယူ၍ ယခုမိုးစပါးစီမံကိန်းတွင် ပိုမိုအောင်မြင်အောင်ဆောင်ရွက်ကြရမှာ ဖြစ်ပါကြောင်း၊ တစ်ဧကအထွက်နှုန်းပိုမိုတိုးတက်ထွက်ရှိစေရေးနှင့် အရည်အသွေးကောင်းမွန်သည့် ဆန်စပါးများ စိုက်ပျိုးထုတ်လုပ်နိုင်ရေးနှင့် Contract Farming စနစ်ဖြင့် အကျိုးတူပူးပေါင်းဆောင်ရွက်နိုင်ရေး ကိုလည်းချိတ်ဆက်ဆောင်ရွက်ရမှာဖြစ်ပါကြောင်း၊ Contract Farming စနစ်ဖြင့်အကျိုးတူပူးပေါင်း ဆောင်ရွက်နိုင်ရေးအတွက် လာရောက်ရင်းနှီးမြှုပ်နှံမည့် ကုမ္ပဏီများကိုလည်းဖိတ်ခေါ်ပါကြောင်းနှင့် သို့မှသာ ပန်းတိုင်အထွက်နှုန်းရောက်ရှိနိုင် ရေးမြန်မြန်ထက်ထက်ဆောင်ရွက်နိုင်မည်ဖြစ်ပါကြောင်း၊ သွင်းအားစုများ တင်သွင်းသည့်ကုမ္ပဏီများ၊ တောင်သူများ များနှင့် ဝယ်ယူကြိတ်ခွဲတင်ပို့သူများအနေဖြင့်လည်း အဆင်ပြေမည်ဖြစ်ပါကြောင်း၊ စပါးအထွက်နှုန်းများ တိုးတက်စေရေးအတွက်လည်း တက်ရောက် လာသူများလည်း ဝိုင်းဝန်းဆွေးနွေးပေးကြစေလိုကြောင်း"အဖွင့်အမှာစကားပြောကြားသည်။ ယင်းနောက် လုံခြုံရေးနှင့်နယ်စပ်ရေးရာဝန်ကြီးက နိုင်ငံ့စီးပွားမြှင့်တင်ရေး ရန်ပုံငွေ(၈၆) ဘီလီယံဖြင့် ဆောင်ရွက်သည့် လုပ်ငန်းဆိုင်ရာ ကိစ္စရပ်များအားလည်းကောင်း၊ စီးပွားရေးရာဝန်ကြီးက နိုင်ငံ့စီးပွားမြှင့်တင်ရေးရန်ပုံငွေ(၈)ဘီလီယံနှင့် ပတ်သက်၍ လည်းကောင်း၊ စိုက်ပျိုးရေးဦးစီးဌာန တိုင်းဒေသကြီးဦးစီးမှူးက စီမံကိန်းလုပ်ငန်းများနှင့် ပတ်သက်၍ လည်းကောင်းအသီးသီးဆွေးနွေးခဲ့ကြသည်။ ယင်းနောက် အခမ်းအနားသို့တက်ရောက်လာသူများ၏ အထွေထွေဆွေးနွေး တင်ပြချက်များနှင့် တိုင်းဟိသဘာဝဇီဝမြေဩဇာကုမ္ပဏီမှ သဘာဝဇီဝမြေဩဇာစက်ရုံမှ သဘာဝ ဇီဝမြေဩဇာ၊ စိုက်ပျိုးမွေးမြူရေးသုံးဇီဝဖျော်ရည် ထုတ်လုပ်ဖြန့်ဖြူးမှုအခြေအနေများရှင်းလင်း တင်ပြမှုအပေါ် တိုင်းဒေသကြီးဝန်ကြီးချုပ်က လိုအပ်သည်များကို ဖြည့်စွက်ဆွေးနွေးခဲ့ပြီး ဆွေးနွေးတင်ပြချက်များအပေါ်သက်ဆိုင်ရာတာဝန်ရှိသူများနှင့် ပေါင်းစပ်ညှိနှိုင်းဆောင်ရွက် ပေးခဲ့ကြောင်းသိရသည်။

စံပြကျေးရွာနှင့်စိုက်ပျိုးရေးသမဝါယမအသင်းများသို့ ဒေဒေါင်းထွန်စက်နှင့်ဆက်စပ်ပစ္စည်းများ ပေးအပ်ပွဲအခမ်းအနားအား ယနေ့နံနက်ပိုင်းက ပုသိမ်မြို့၊ သမဝါယမစာရင်းရေးစာရင်းကိုင် သက်မွေးပညာသင်တန်းကျောင်း (မြက်တို)၌ ပြုလုပ်ခဲ့ရာ အခမ်းအနားသို့ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ ဌာနဆိုင်ရာများ၊ စိုက်ပျိုးရေးသမဝါယမ အသင်းသားများ၊ သမဝါယမစာရင်းရေးစာရင်းကိုင် သက်မွေးပညာသင်တန်းကျောင်းမှ သင်တန်းသား၊ သင်တန်းသူများတက်ရောက်ခဲ့သည်။ အခမ်းအနားတွင် တိုင်းဒေသကြီးဝန်ကြီးချုပ်ဦးတင်မောင်ဝင်းက“လယ်ယာဝန်ဆောင်မှုလုပ်ငန်းဆောင်ရွက်မည့် သမဝါယမအသင်း များအားထောက်ပံ့ပေးသည့် ဒေဒေါင်းထွန်စက်များနှင့် အသင်းသားများပိုင်ဆိုင်သည့်လယ်ယာမြေများကို အချိန်မီစနစ်တကျ ထွန်ယက်နိုင်ရန် ထောက်ပံ့ပေးခြင်းဖြစ်ပါကြောင်း၊ ဧရာဝတီတိုင်း ဒေသကြီးသည် စိုက်ပျိုးမွေးမြူရေးတွင် နိုင်ငံတော်မှ အားထားရသည့် တိုင်းဒေသကြီးဖြစ်ပြီး လယ်ယာသုံးစက်ကိရိယာအရောင်းပြခန်းများစွာ လည်းရှိပါကြောင်း၊ တိုင်းဒေသကြီးသည် နွေစပါးနှင့်မိုးစပါး(၅၂)သိန်းကျော်စိုက်ပျိုးလျက်ရှိပြီး ပန်းတိုင်အထွက်နှုန်းရရှိအောင် ဆောင်ရွက်နေသကဲ့သို့ ပဲမျိုးစုံ(၁၆)သိန်းကျော်စိုက်ပျိုးနိုင်ခဲ့ပြီး ဆီဖူလုံရေးအတွက် ဆီထွက်သီးနှံ(နေကြာ)တိုးချဲ့စိုက်ပျိုးလျက်ရှိပါကြောင်း၊ တောင်သူများအနေဖြင့် စိုက်ပျိုးမွေးမြူရေးကိုအခြေခံ၍ ကုန်ချောများ၊ တန်ဖိုးမြင့်ထုတ်ကုန်များ ထုတ်လုပ်နိုင်ပါက ဝင်ငွေများလည်းတိုးတက်လာမည်ဖြစ်ပါကြောင်း၊ ယခုနှစ် မိုးစပါးစိုက်ရာသီ တွင် တစ်ဧက(၁၀)တင်းနှုန်း ပိုမိုတိုးတက်ထွက်ရှိရေးအတွက်ဆောင်ရွက်လျက်ရှိပြီး တစ်ဧက အထွက်နှုန်းများတိုးတက်စေရေးအတွက် မျိုးကောင်းမျိုးသန့် စပါးများဖြင့် ပြောင်းလဲစိုက်ပျိုးခြင်း၊ စိုက်ပျိုးနည်းစနစ်ပြောင်းလဲစိုက်ပျိုးခြင်းများဆောင်ရွက်လျက်ရှိပါကြောင်း၊ လာမည့်နှစ်မိုးစပါးစိုက် ရာသီတွင် မြေဆီလွှာဖွံ့ဖြိုးတိုးတက်ရေးအတွက် ရေတော်မိုးတော်(၂၇)သိန်းအား သစ်စိမ်းမြေဩဇာ ပိုက်ဆံလျှော်များ အပြည့်အဝထည့်သွင်းစိုက်ပျိုးသွားမည်ဖြစ်ပြီး ဓာတ်မြေဩဇာသုံးစွဲမှုလျော့ချနိုင်ရန် နှင့် သဘာဝမြေဩဇာ၊ ဇီဝမြေဩဇာများထုတ်လုပ်နိုင်ရေးလည်းဆောင်ရွက်နေပါကြောင်း၊ နိုင်ငံ့စီးပွားမြှင့်တင်ရေးရန်ပုံငွေများဖြင့် စိုက်ပျိုးမွေးမြူရေး၊ ကုန်ထုတ်သမဝါယမအသင်းများနှင့် MSME လုပ်ငန်းများအတွက် နိုင်ငံတော်မှပံ့ပိုးပေးနေသကဲ့သို့ တိုင်းဒေသကြီးအစိုးရ အနေဖြင့်လည်း အားကြိုး မာန်တက် လိုက်ပါဆောင်ရန်လိုအပ်ပါကြောင်းနှင့် တောင်သူများ အနေဖြင့်လည်း သမဝါယမစိတ်ဓာတ်ကို အခြေခံ၍ ကုန်ထုတ်သမဝါယမအသင်းများ၊ စံပြကျေးရွာများကလည်း အောင်မြင်အောင် အကောင်အထည်ဖော်ဆောင်ရွက်ပေးကြရန်”အဖွင့်အမှာစကားပြောကြားသည်။ ဆက်လက်၍ သမဝါယမဦးစီးဌာနတိုင်းဒေသကြီးဦးစီးမှူးက ဒေဒေါင်းထွန်စက်နှင့် နောက်ဆက်တွဲပစ္စည်းများ ထောက်ပံ့ပေးအပ်ရန် စီစဉ်ဆောင်ရွက်ထားရှိမှု အခြေအနေများကို ရှင်းလင်းတင်ပြပြီးနောက် တိုင်းဒေသကြီးဝန်ကြီးချုပ်က ရေကြည်မြို့နယ်၊ လေးမျက်နှာမြို့နယ်၊  မြောင်းမြမြို့နယ်၊ ပန်းတနော်မြို့နယ်များမှ စံပြကျေးရွာ(၄)ရွာရှိ သမဝါယမအသင်းများသို့ ဒေဒေါင်းထွန်စက်နှင့် ဆက်စပ်ပစ္စည်းများအားလည်းကောင်း၊ ကြံခင်းမြို့နယ်၊ ဝါးခယ်မမြို့နယ်၊ လပွတ္တာမြို့နယ်၊ ပန်းတနော်မြို့နယ်များမှ စိုက်ပျိုးရေးသမဝါယမအသင်းများသို့ လုံခြုံရေးနှင့် နယ်စပ်ရေးရာဝန်ကြီးကလည်းကောင်း၊ ဓနုဖြူမြို့နယ်၊ ကျိုက်လတ်မြို့နယ်၊ ညောင်တုန်းမြို့နယ် များမှစိုက်ပျိုးရေးသမဝါယမအသင်းများသို့ လမ်းပန်းဆက်သွယ်ရေးဝန်ကြီးကလည်းကောင်း ဒေဒေါင်းထွန်စက်နှင့် ဆက်စပ်ပစ္စည်းများအသီးသီးပေးအပ်ခဲ့ကြပြီး သမဝါယမအသင်းသားတစ်ဦး က ကျေးဇူးတင်စကားများပြန်လည်ပြောကြားကာ တိုင်းဒေသကြီးဝန်ကြီးချုပ်ကနိဂုံးချုပ် စကားပြောကြားခဲ့သည်။  ထို့နောက်တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင်ဝန်ကြီးများသည် ဒေဒေါင်းလယ်ယာသုံးစက်များ စမ်းသပ်မောင်းနှင်မှုကို ကြည့်ရှုအားပေးခဲ့သည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် သမဝါယမစာရင်းရေးစာရင်းကိုင် သက်မွေးပညာ သင်တန်းကျောင်းဆောင်အား လှည့်လည်ကြည့်ရှုစစ်ဆေးခဲ့ပြီး သင်တန်းသား၊ သင်တန်းသူများနှင့် နေ့လယ်စာများအတူတကွသုံးဆောင်ခဲ့ကြကာ သင်တန်းသား၊ သင်တန်းသူများအတွက် ထောက်ပံ့ငွေများ ကိုပေးအပ်ခဲ့ရာ ကျောင်းအုပ်ကြီးကလက်ခံရယူခဲ့သည်။ သမဝါယမစာရင်းရေး စာရင်းကိုင်သက်မွေးပညာသင်တန်းကျောင်းတွင် ပထမနှစ်သင်တန်းသား၊ သင်တန်းသူ(၅၀)ဦး နှင့် ဒုတိယနှစ် သင်တန်းသား၊ သင်တန်းသူ (၄၁) ဦးတက်ရောက်လျက်ရှိကြောင်းသိရသည်။

ခရိုင်အဆင့်၊ တိုင်းဒေသကြီးအဆင့်မှသည် နိုင်ငံ့လက်ရွေးစင်များအထိ ထူးချွန်ထက်မြက်သည့် မျိုးဆက်သစ်အားကစားသမားများ ထွက်ပေါ်လာစေရန်ရည်ရွယ်၍ ဧရာဝတီတိုင်း ဒေသကြီး၊ ပုသိမ်မြို့၌ ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ်ဖလား (၈) ခရိုင်၊ အသက် ၁၉ နှစ်အောက် အမျိုးသမီးဘောလုံးပြိုင်ပွဲ ဖွင့်ပွဲအခမ်းအနားအား ယနေ့ညနေပိုင်းက ကိုးသိန်းအားကစားကွင်း၌ပြုလုပ်ရာ  တိုင်းဒေသကြီးဝန်ကြီးချုပ် ဦးတင်မောင်ဝင်းနှင့်ဇနီး၊ အနောက်တောင်တိုင်းစစ်ဌာနချုပ်တိုင်းမှူးနှင့်ဇနီး၊ တိုင်းဒေသကြီးအစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ တိုင်း၊ ခရိုင်၊ မြို့နယ်အဆင့်ဌာနဆိုင်ရာများ၊ ပြိုင်ပွဲဝင်အားကစားသမားများ၊ ဘောလုံးဝါသနာရှင်များ တက်ရောက်ခဲ့ကြသည်။ အသက်၁၉နှစ်အောက် အမျိုးသမီးဘောလုံးပြိုင်ပွဲ ဖွင့်ပွဲအခမ်းအနားတွင် တိုင်းဒေသကြီး ဝန်ကြီးချုပ်က “ ယနေ့ကျင်းပသည့် ဘောလုံးပြိုင်ပွဲအား ဧရာဝတီတိုင်းဒေသကြီးအတွင်းရှိ ခရိုင်အသီးသီးမှ ဘောလုံးအားကစားသမားအချင်းချင်း ချစ်ကြည်ရင်းနှီးမှုခိုင်မာလာစေရေး၊ ခရိုင်တစ်ခုနှင့်တစ်ခု အပြန်အလှန်ပူးပေါင်းဆောင်ရွက်လာနိုင်စေရေး အစရှိသည့် ရည်ရွယ်ချက် များအပြင် ဧရာဝတီတိုင်းဒေသကြီးကိုယ်စားပြု ထူးချွန်ထက်မြက်သည့် အမျိုးသမီးဘောလုံး အားကစားသမားကောင်းများ ပေါ်ထွက်လာစေရေးကိုရည်ရွယ်ပြီး ကျင်းပပြုလုပ်သည့် ပြိုင်ပွဲဖြစ်ပါကြောင်း၊ ဧရာဝတီတိုင်းဒေသကြီးအမျိုးသမီးဘောလုံးအသင်းများသည် အောင်မြင်မှု အစဉ်အလာများရှိသည့် အသင်းများဖြစ်ပါကြာင်း၊ ၂၀၂၀ပြည့်နှစ်၊ ဖေဖော်ဝါရီလတွင် ကျင်းပခဲ့သည့် တိုင်းဒေသကြီးနှင့်ပြည်နယ် အသက်(၂၅)နှစ်အောက် အမျိုးသမီးဘောလုံးပြိုင်ပွဲ၌ ဧရာဝတီတိုင်းဒေသကြီးအနေဖြင့် ဒုတိယ ၊ ၂၀၂၂ခုနှစ်၊ ဒီဇင်ဘာလတွင် ကျင်းပခဲ့သည့် တိုင်းဒေသကြီးနှင့်ပြည်နယ် အသက်(၁၈)နှစ်အောက် အမျိုးသမီးဘောလုံးပြိုင်ပွဲတွင်လည်း တတိယဆုများ ရရှိနိုင်အောင် စွမ်းဆောင်ပေးနိုင်ကြောင်းကိုလည်း တွေ့ရှိရမှာဖြစ်ပါကြောင်း၊ ဘောလုံးအားကစားနည်းသည် လူကြီး၊ လူငယ်၊ အမျိုးသား၊ အမျိုးသမီးမရွေး ကမ္ဘာနှင့်အဝှမ်း စိတ်ပါဝင်စားပြီး အားပေးချီးမြှင့်မှု အများဆုံးဖြစ်သည့် အားကစားနည်းတစ်ရပ်ဖြစ်သကဲ့သို့ အနိုင်ရဗိုလ်စွဲသည့် ဘောလုံးအသင်းအား သောင်းသောင်းဖြဖြ ကြိုဆိုဂုဏ်ပြုကြသည်မှာ အားလုံးအသိပင်ဖြစ်ပါကြောင်း၊ အားကစားဆိုသည်မှာ “ခွန်အားနှင့်ဉာဏ်ရည်ကို အသုံးချပြီး လှုပ်ရှားယှဉ်ပြိုင်မှု ”ဟု အဓိပ္ပာယ်ဖွင့်ဆိုထားသည့်အတွက် ယှဉ်ပြိုင်မှုပြင်းထန်လာသည့်အခါ ကစားသမားများအနေဖြင့် သတ်မှတ်ထားသည့်ဥပဒေများကို လိုက်နာရမည်ဖြစ်ပြီး စည်းကမ်း သေဝပ်မှု၊ တရားသောယှဉ်ပြိုင်အနိုင်ရရှိမှုကိုကျင့်သုံးရန်လိုအပ်မည်ဖြစ်ပါကြောင်း၊ ပြိုင်ပွဲ ယှဉ်ပြိုင်နေစဉ်အတွင်းမှာလည်း ပြိုင်ဘက်အသင်းအား သည်းခံမှု၊ စိတ်ရှည်မှု၊ နားလည်မှုရှိပြီး ရှုံးခဲ့လျှင်လည်း အရှုံးကိုကျေနပ်စွာလက်ခံပြီး ပြိုင်ပွဲပြီးစီးသည်အထိ ယှဉ်ပြိုင်ရဲသည့် ကြံ့ခိုင်သော စိတ်ဓာတ်ရှိရန်လည်းလိုအပ်မည်ဖြစ်ပါကြောင်း၊ ယခုပြိုင်ပွဲမှတစ်ဆင့် မိမိတို့၏ခရိုင်၊ မိမိတို့ တိုင်းဒေသကြီး၏ဂုဏ်ကိုဆောင်နိုင်ပြီး နိုင်ငံ့ဂုဏ်ဆောင် အားကစားသမားများဖြစ်အောင် ကြိုးစားဆောင်ရွက်ရန်လိုပါကြောင်း”  တိုက်တွန်းမှာကြား၍ ဧရာဝတီတိုင်းဒေသကြီး အစိုးရအဖွဲ့ဝန်ကြီးချုပ်ဖလား (၈) ခရိုင်၊ အသက်၁၉ နှစ်အောက် အမျိုးသမီးဘောလုံးပြိုင်ပွဲအား ဖွင့်လှစ်ပေးသည်။ ဆက်လက်၍ စစ်ကြောင်းမှူးဦးဆောင်သည့် ပြိုင်ပွဲဝင်အသင်းများက ဝန်ကြီးချုပ်အား အလေးပြုခြင်းနှင့် အားကစားသစ္စာအဓိဌာန် (၄)ချက်အားရွတ်ဆိုခြင်းများကို ဆောင်ရွက်ခဲ့ကြပြီး နောက် ပြိုင်ပွဲဝင်အသင်းများက ကွင်းအတွင်းမှပြန်လည်ထွက်ခွာခဲ့ကြသည်။ ယင်းနောက် တိုင်းဒေသကြီးဝန်ကြီးချုပ်နှင့်တာဝန်ရှိသူများသည် အဖွင့်ပွဲစဉ်အဖြစ်  ကျုံပျော်ခရိုင်အသင်းနှင့် ပုသိမ်ခရိုင်အသင်းတို့၏ အကြိတ်အနယ် ယှဉ်ပြိုင်ကစားမှုများကို ကြည့်ရှုအားပေးခဲ့သည်။ အဆိုပါဘောလုံးပွဲစဉ်များအား ယခုလ (၅)ရက်နေ့မှ (၁၄)ရက်နေ့အထိ ကျင်းပပြုလုပ်သွားမည် ဖြစ်ကြောင်း သိရသည်။