ဧရာဝတီတိုင်းဒေသကြီး၊ အိမ်မဲမြို့နယ်၊ ဘုရားကုန်းကျေးရွာလျှပ်စစ်မီး ဖွင့်ပွဲအခမ်းအနားအား ယနေ့နံနက်ပိုင်းက  ပြုလုပ်ခဲ့ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း တက်ရောက်ဖွင့်လှစ်ပေးခဲ့သည်။ ဦးစွာ တိုင်းဒေသကြီး ဝန်ကြီးချုပ်နှင့်တာဝန်ရှိသူများက အိမ်မဲမြို့နယ်၊ဘုရားကုန်းကျေးရွာ၌ အမျိုးသားလျှပ်စစ်ဓာတ်အားရရှိရေး (ဒုတိယအဆင့်)( NEP Phase II)ဖြင့်ဆောင်ရွက်သော ကျေးရွာလျှပ်စစ်မီး ဖွင့်ပွဲအခမ်းအနားအား ဖဲကြိုးဖြတ်ဖွင့်လှစ်ပေးပြီး လျှပ်စစ်မီးအား မီးခလုပ်နှိပ်ဖွင့်လှစ်ကာ ကမ္ဗည်းမော်ကွန်းအား အစိုးရအဖွဲ့ဝင် ဝန်ကြီးများနှင့်အတူ အမွှေးနံ့သာရည်များ ပက်ဖျန်းပေးခဲ့သည်။ယင်းနောက်  လျှပ်စစ်မီးဖွင့်ပွဲ အခမ်းအနားသို့ တက်ရောက်လာသူများနှင့်အတူ စုပေါင်းမှတ်တမ်းဓာတ်ပုံများရိုက်ကူးခဲ့ကြပြီး ကျေးရွာအတွင်း မီတာတပ်ဆင် ထားမှုများနှင့် လျှပ်စစ်မီးသုံးစွဲ မှုများအား လှည့်လည်ကြည့်ရှုစစ်ဆေးခဲ့သည်။ အဆိုပါ ကျေးရွာ၌ လျှပ်စစ်မီး ဖွင့်လှစ်ပေးခြင်းကြောင့် အိမ်ခြေ( ၅၄ ) အိမ်ထောင်စု(၅၄)စုတို့လျှပ်စစ်မီးများစတင်သုံးစွဲနိုင်မည်ဖြစ်ကြောင်းသိရသည်။ ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ကန်ကုန်းကျေးရွာအခြေခံပညာအထက်တန်းကျောင်းခွဲသို့သွားရောက်၍ ဆရာဆရာမများနှင့်တွေ့ဆုံခဲ့ကာ စာသင်ဆောင်လိုအပ်ချက်၊ လျှပ်စစ်မီးလိုအပ်ချက်များတင်ပြမှုများအပေါ် သက်ဆိုင်ရာဌာနများနှင့်ပေါင်းစပ်ဆောင်ရွက်ပေးခဲ့ပြီး ကျောင်းဝန်းအတွင်းလှည့်လည်ကြည့်ရှုစစ်ဆေးခဲ့ပြီး တက္ကသိုလ်ဝင်တန်းအောင်ချက်မြင့်မားရေး အတွင်းအပြင်ကျောင်းသားကျောင်းသူများအားအချိန်ပိုသင်ကြားပို့ချနေမှုကိုကြည့်ရှုအားပေးခဲ့ပြီး စနစ်တကျလေ့လာမှတ်သားသင်ယူကြရန်နှင့် ရာနှုန်းပြည့်အောင်မြင်စေရေးကြိုးစားကြရန်မှာကြားခဲ့ကာ ကျောင်းသုံးပစ္စည်းများနှင့်ထောက်ပံ့ငွေများပေးအပ်ခဲ့ကြောင်းသိရှိရသည်။

ဧရာဝတီတိုင်းဒေသကြီး အစိုးရအဖွဲ့ရုံး အစည်းအဝေး ခန်းမ(၁)၌မွေးမြူရေးလုပ်ငန်းရှင်များ၊ စိုက် ပျိုးရေးလုပ်ငန်းရှင်များနှင့် တွေ့ဆုံပွဲ အခမ်းအနား ကျင်းပပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်း၊ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး၊ အစိုးရအဖွဲ့ဝင် ဝန်ကြီးများနှင့် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနအောက်ရှိ ဦးစီးဌာနများမှညွှန်ကြားရေးမှူး ချုပ်များ၊ ဌာနဆိုင်ရာများ၊စိုက်ပျိုး မွေးမြူရေးလုပ်ငန်းရှင်များ တက်ရောက်ခဲ့ကြသည်။ အခမ်းအနားတွင် တိုင်းဒေသကြီး ဝန်ကြီးချုပ်က“ မိမိတို့တိုင်းဒေသကြီးသည် စိုက်ပျိုးမွေးမြူရေးကိုအခြေခံသည့် တိုင်းဒေသကြီးဖြစ်ပါကြောင်း၊ မိုးစပါး၊ နွေစပါး၊ ပဲမျိုးစုံအပါအဝင် ဆီထွက်သီးနှံများ စိုက်ဧက ပြည့် မီရေး၊အထွက်နှုန်းတိုးရေးစီမံချက်များရေးဆွဲအကောင်အထည်ဖော်ဆောင်ရွက်လျက်ရှိပြီး  ဆီစက်များ အဆင့်မြှင့်တင်လည်ပတ်နိုင်ရေး လိုအပ်သည်များကူညီဆောင်ရွက်လျက်ရှိပါကြောင်း၊ တိုင်းဒေသကြီးအတွင်း ရိုးပြက်ကျန်ဧကများတွင် စပါးနှင့်အခြားသီးနှံများစိုက်ပျိုးနိုင်ရေးကြိုးပမ်းဆောင်ရွက်လျက်ရှိပါကြောင်း၊ နေကြာနှင့်ကော်ဖီတိုးချဲ့စိုက်ပျိုးနိုင်ရေး၊ ပျော့ဖတ်အတွက်ဝါးနှင့်သစ်မာတိုးချဲ့စိုက်ပျိုးနိုင်ရေးတို့အတွက် ဆောင်ရွက်လျက်ရှိပါကြောင်း၊ အောင်မြင်စွာဆောင်ရွက်နိုင်ရေး၊ သွင်းအားစုပံ့ပိုးပေးနိုင်ရေးဆောင်ရွက်လျက်ရှိပါကြောင်း၊ တောင်သူများ၏ ဓာတ်မြေသြဇာလိုအပ်ချက်များအပေါ် သဘာဝမြသြဇာ၊ ဇီဝမြသြဇာ၊ သစ်စိမ်းမြေသြဇာ(ပိုက်ဆံလျှော်) များပိုမိုထုတ်လုပ်အသုံးပြုနိုင်စေရေးနှင့် လာမည့်မိုးစပါးစိုက်ပျိုးရာတွင် ပိုက်ဆံလျှော် ဧက တစ်သိန်းထည့်သွင်းစိုက်ပျိုးနိုင်ရေးနှင့် နောင်နှစ်များတွင်းရေတော်မိုးတော် မိုးစပါးစိုက်ဧကအပြည့် ပိုက်ဆံလျှော်ထည့်သွင်း စိုက်ပျိုးနိုင်ရေးဆောင်ရွက်လျက်ရှိပါကြောင်း၊ ဧက၁၀၀ တင်း၁၀၀စံပြကွက်များဖော်ထုတ်၍ တောင်သူများသို့နည်းပညာ၊အသိပညာပေးလုပ်ငန်းများပိုမိုတွင်ကျယ်စွာဆောင်ရွက်လျှက်ရှိပါကြောင်း၊ ပေါ်ဆန်းစပါးအရည်အသွေးကောင်းမွန်စေရေးနှင့်စျေးကွက်ရရှိစေရေးသုတေသနပြုလုပ်ငန်းများဆောင်ရွက်လျက်ရှိပါကြောင်း၊ အင်းနှင့်ကမ်းနီးကမ်းဝေးငါးဖမ်းခြင်းအပြင်သားငါးမွေးမြူရေးကဏ္ဍဖွံ့ဖြိုးတိုးတက်အောင်ဆောင်ရွက်လျက်ရှိပြီး ပြင်တွင်းတွင်သာမက ပြည်ပနိုင်ငံများသို့ တင်ပို့နိုင်ရေးဆောင်ရွက်လျက်ရှိပါကြောင်းနှင့်တိုင်းဒေသကြီး၏ စိုက်ပျိုးမွေးမြူရေးလုပ်ငန်းများအောင်မြင်စွာဆောင်ရွက်နိုင်စေရေး ဌာနဆိုင်ရာများ၊ လုပ်ငန်းရှင်များ၊ တောင်သူများနှင့်ပူးပေါင်းဆောင်ရွက်လျက်ရှိကြောင်းဆွေးနွေးပြောကြားသည်။ ဆက်လက်၍ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီးက “ဓာတ်မြေသြဇာထုတ်လုပ်ဖြန့်ဖြူးမှု၊ တင်သွင်းဖြန့်ဖြူးမှုအခြေအနေများ၊ ဧက၁၀၀တင်း၁၀၀စံပြကွက်များထူထောင်၍ ပန်းတိုင်အထွက်နှုန်းများပြည့်မီကျော်လွန်စေရေးဆောင်ရွက်နေမှုအခြေအနေများ၊ ဆီထွက်သီးနှံနေကြာ၊ ကော်ဖီ၊ဝါးစိုက်ပျိုးခြင်းလုပ်ငန်းများအောင်မြင်စွာဆောင်ရွက်နိုင်ရေး ကူညီထောက်ပံ့ဆောင်ရွက်ပေးမည့်အခြေအနေများ၊ မွေးမြူရေးလုပ်ငန်းများအဆင့်မြှင့်တင်မွေးမြူနိုင်ရေးကြိုးစားဆောင်ရွက်နေမှုအခြေအနေများနှင့် နိုင်ငံ့စီးပွားမြှင့်တင်ရေး ရန်ပုံငွေမှ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ အရင်းမပျောက်မတည်ထောက်ပံ့ငွေထောက်ပံ့ပေးမည့်အခြေအနေများအား ရှင်းလင်းဆွေးနွေးပြောကြားသည်။ ယင်းနောက် ဧရာဝတီတိုင်းဒေသကြီးအစိုးရအဖွဲ့လုံခြုံရေးနှင့်နယ်စပ်ရေးရာဝန်ကြီးက ဧရာဝတီတိုင်းဒေသကြီးအတွင်း နိုင်ငံ့စီးပွားမြှင့်တင်ရေးရန်ပုံငွေဖြင့် နွေစပါး/ပဲတီစိမ်းသီးနှံများ စိုက်ပျိုးရန်အတွက် ဆောင်ရွက်ထားရှိမှု လုပ်ငန်းစဉ်များအားရှင်းလင်းတင်ပြခဲ့ပြီး ၊မွေးမြူရေးနှင့် ကုသရေးဦးစီးဌာနညွှန်ကြားရေးမှူးချုပ်က  နိုင်ငံ့စီးပွားမြှင့်တင်ရေး ရန်ပုံငွေမှ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ အရင်းမပျောက်မတည်ထောက်ပံ့ငွေဖြင့် ဆောင်ရွက်မည့် မွေးမြူရေးလုပ်ငန်းများ ဖွံ့ဖြိုးတိုးတက်ရေးလုပ်ငန်းစီမံကိန်းနှင့် ပတ်သက်၍ရှင်းလင်း‌ဆွေးနွေးခဲ့သည်။ဆက်လက်၍ မွေးမြူရေးလုပ်ငန်းရှင်များကိုယ်စားလုပ်ငန်းရှင်(၁)ဦးကလည်းကောင်း၊စိုက်ပျိုးရေးလုပ်ငန်းရှင်များကိုယ်စား လုပ်ငန်းရှင်(၁)ဦးကလည်းကောင်း အသီးသီးဆွေးနွေးခဲ့ရာ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီးက လိုအပ်သည်များဖြည့်စွက်ဆွေးနွေးပြောကြားခဲ့ပြီး တိုင်းဒေသကြီးဝန်ကြီးချုပ်က နိဂုံးချုပ်အမှာစကားပြောကြားခဲ့ကြောင်းသိရှိရသည်။

တစ်မျိုးသားလုံးကျန်းမာသန်စွမ်းပြီး ကိုယ်လက်ကြံ့ခိုင်ရေးအတွက် တစ်နိုင်ငံလုံးအတိုင်းအတာဖြင့် ဒီဇင်ဘာလအား လူထုလှုပ်ရှား အားကစားလအဖြစ် သတ်မှတ်၍ နှစ်စဉ်နှစ်တိုင်း  စုပေါင်းလမ်းလျှောက်ပွဲကို ပြုလုပ်လျှက်ရှိရာ ဧရာဝတီတိုင်းဒေသကြီး၊ပုသိမ်မြို့တွင်လည်း စုပေါင်းလမ်းလျှောက်ပွဲအား ယနေ့နံနက်ပိုင်းက ရွှေရုပ်တုအဝိုင်းရှေ့တွင်ပြုလုပ်ခဲ့ရာ တိုင်းဒေသကြီး ဝန်ကြီးချုပ်ဦးတင်မောင်ဝင်းနှင့်ဇနီး၊တိုင်းဒေသကြီးတရာသူကြီးချုပ်၊ အစိုးရအဖွဲ့ဝင် ဝန်ကြီးများနှင့်ဇနီးများ၊ဌာနဆိုင်ရာများ၊ပြည်သူများပါဝင်ဆင်နွှဲခဲ့ကြသည်။ စုပေါင်းလမ်းလျှောက်ပွဲအား ရွှေရုပ်တုအဝိုင်းရှေ့မှစတင်၍ မဟာဗန္ဓုလလမ်းမကြီးအတိုင်း ကိုးသိန်းအားကစားကွင်းသို့ တပျော်တပါး စုပေါင်းလမ်းလျှောက်ခဲ့ကြပြီး ကိုယ်လက်လှုပ်ရှားလေ့ကျင့်ခန်းများအား စုပေါင်းဆောင်ရွက်ခဲ့ကြသည်။အဆိုပါစုပေါင်းလမ်းလျှောက်ပွဲသို့ ဌာနဆိုင်ရာများ၊လူမှုရေးအသင်းအဖွဲ့များနှင့် ဒေသခံပြည်သူများအပါအဝင် အင်အား (၂၁၀၀ )ဦးခန့်က တပျော်တပါး ပါဝင်ဆင်နွှဲခဲ့ကြသည်။  ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ဧရာဝတီတိုင်းဒေသကြီးအစိုးရအဖွဲ့ဝန်ကြီးချုပ်ဖလား၂၆ မြို့နယ် အသက်၂၅နှစ်အောက် ပြေးခုန်ပစ်ပြိုင်ပွဲဗိုလ်လုပွဲနှင့်ဆုချီးမြှင့်ပွဲအခမ်းအနားတက်ရောက်အားပေးခဲ့ကြပြီး ဗိုလ်လုပွဲစဉ်များအဖြစ် အမျိုးသား၊အမျိုးသမီး မီတာ ၈၀၀ နှင့်မီတာ ၁၀၀ အပြေးပြိုင်ပွဲအားလည်းကောင်း၊အမျိုးသား၊အမျိုးသမီးမီတာ (၄၀၀×၄)လက်ဆင့်ကမ်းပြိုင်ပွဲများအား ကြည့်ရှုအားပေးခဲ့ကြသည်။ ယင်းနောက် ဆုချီးမြှင့်ပွဲအခမ်းအနားအား ဆက်လက်ပြုလုပ်ရာ အမျိုးသား၊ အမျိုးသမီးလှံတံပစ်ပြိုင်ပွဲ၊သုံးဆင့်ခုန်ပြိုင်ပွဲ၊ ပထမ၊ဒုတိယ၊တတိယဆုရရှိသူများအား တစ်ဦးချင်းဆုတံဆိပ်နှင့် ငွေသားဆုများကို ဌာဆိုင်ရာ တာဝန်ရှိသူများကလည်းကောင်း၊ မီတာ၈၀၀အပြေးပြိုင်ပွဲ၊ မီတာ ၁၀၀ အပြေးပြိုင်ပွဲများတွင် ပထမ၊ဒုတိယ၊တတိယဆုရရှိသူများအား တစ်ဦးချင်းဆုတံဆိပ်နှင့် ငွေသားဆုများကို တိုင်းဒေသကြီးတရားသူကြီးချုပ်နှင့် တိုင်းရင်းသားရေးရာဝန်ကြီးတို့ကလည်းကောင်း၊ အမျိုးသား၊ အမျိုးသမီးမီတာ (၄၀၀×၄)လက်ဆင့်ကမ်းပြိုင်ပွဲတွင် ပထမ၊ဒုတိယ၊တတိယဆုရရှိသူများအား တစ်ဦးချင်းဆုတံဆိပ်နှင့် ငွေသားဆုများကိုလမ်းပန်းဆက်သွယ်ရေးဝန်ကြီးနှင့် လူမှုရေးရာဝန်ကြီးတို့ကလည်းကောင်း၊ပွဲစဉ်တစ်လျှောက်အကောင်းဆုံးအားကစားသမား ဆုရရှိသူများအား တစ်ဦးချင်းဆုတံဆိပ်နှင့် ငွေသားဆုများအား သယံဇာတရေးရာ ဝန်ကြီးကလည်းကောင်း၊အမျိုးသမီး တံခွန်စိုက်ဆုဖလားရရှိသော ကျောင်းကုန်းမြို့နယ်အသင်းအား ဆုဖလားကို ဝန်ကြီးချုပ်၏ ဇနီးက လည်းကောင်းဆုများအသီးသီးချီးမြှင့်ခဲ့ကြပြီး တိုင်းဒေသကြီး ဝန်ကြီးချုပ်က အမျိုးသား တံခွန်စိုက်ဆုနှင့် အမျိုးသား၊အမျိုးသမီး စုပေါင်းတံခွန်စိုက်ဆုရရှိသော ပုသိမ်မြို့နယ်အသင်းအား တံခွန်စိုက်ဆုဖလားကို ပေးအပ်ချီးမြှင့်ခဲ့ကာ စုပေါင်းမှတ်တမ်းတင်ဓာတ်ပုံများ ရိုက်ကူးခဲ့ကြကြောင်းသိရသည်။

(၄)နှစ်သင်ပညာရေးဒီဂရီကောလိပ်၊ ပထမနှစ်ကျောင်းသား၊ ကျောင်းသူများအား မောင်မယ် သစ်လွင်ကြိုဆိုပွဲကို ယနေ့နံနက်ပိုင်းက ပုသိမ်ပညာရေးဒီဂရီကောလိပ်၌ပြုလုပ်ရာ တိုင်းဒေသကြီးဝန်ကြီးချုပ် ဦးတင်မောင်ဝင်းနှင့် အစိုးရအဖွဲ့ဝင်ဝန်ကြီးများ၊ တိုင်း၊ ခရိုင်၊ မြို့နယ်အဆင့် ဌာနဆိုင်ရာများ၊ ပညာရေးဒီဂရီကောလိပ်မှ ဆရာ၊ဆရာများနှင့် ကျောင်းသား၊ ကျောင်းသူများ တက်ရောက်ခဲ့ ကြသည်။ ဦးစွာ "ကြိုဆိုလက်ကမ်းကံ့ကော်တန်း" သီချင်းဖြင့် အခမ်းအနားကိုဖွင့်လှစ်ခဲ့ပြီး တိုင်းဒေသကြီး ဝန်ကြီးချုပ်က " မောင်တို့မယ်တို့အနေနဲ့ မိမိတို့ရွေးချယ်လိုက်သည့် ပညာရေးလမ်းကြောင်းပေါ်ကို စတင်ရောက်ရှိခဲ့ပြီဖြစ်ပါကြောင်း၊ ပညာရေးဒီဂရီကောလိပ်တွင် ၄ နှစ်တာ လေ့လာဆည်းပူး၍ ဘွဲ့များအသီးသီးရရှိပြီး အခြေခံပညာကျောင်းများမှ ကျောင်းသား၊ ကျောင်းသူများကို ပညာသင်ကြားပေးရမည့် ဆရာ၊ ဆရာမများ ဖြစ်လာကြမှာဖြစ်ပါကြောင်း၊ နိုင်ငံတစ်နိုင်ငံ ဖွံ့ဖြိုးတိုးတက်ရန်အတွက် ပညာရေးဖြင့် ရင်းနှီးမြှုပ်နှံရမှာ ဖြစ်သလို ထိုသို့ဆောင်ရွက်ရာမှာ ဆရာ၊ ဆရာမများ၏ ကဏ္ဍသည် အဓိကဖြစ်ပါကြောင်း၊ ပညာရေးကဏ္ဍ တိုးတက်ပြောင်းလဲရန်အတွက် ဆရာ၊ ဆရာမများက စတင်ပြောင်းလဲရမှာ ဖြစ်ပါကြောင်း၊ မောင်တို့မယ်တို့အနေဖြင့် သင်ကြားပေးမည့် ဆရာဖြစ်ရန်အတွက် ဦးစွာသင်ယူကြရမည်ဖြစ်ပါကြောင်း၊ ဆရာ၊ဆရာမများအနေဖြင့် မိမိ၏ တပည့်များအား မတတ်သည်များကို တတ်အောင်၊  မသိသည်များကို သိအောင်၊ နားမလည်သည်များကို နားလည်အောင်၊ မကျွမ်းကျင်သည်များကို ကျွမ်းကျင်အောင်၊ မလိမ္မာသည်များကို လိမ္မာအောင်၊ လမ်းမှားရောက်နေသည်များကို လမ်းမှန်ရောက်အောင် သွန်သင်ဆုံးမပေးရမှာ ဖြစ်ပါကြောင်း၊ စေတနာ၊ ဝါသနာ၊ အနစ်နာ စသည့်နာသုံးနာကို အရင်းခံပြီး စွမ်းဆောင်ရည်နှင့် အရည် အသွေး မြင့်မားရေးအတွက် အစဉ်လေ့လာသင်ယူနေကြသည့် ထာဝရကျောင်းသားကြီးများ အဖြစ်ခံယူ၍ လေ့လာဆည်းပူးကြရန်၊ တပည့်များ၏ အတုယူစရာ စံနမူနာပြများ ဖြစ်စေရေး ဆရာ ကျင့်ဝတ်နှင့်အညီ ပြုမူနေထိုင်ကြရန်နှင့် နိုင်ငံတော်နှင့်တိုင်းဒေသကြီးအတွက် အားကိုးအားထားပြု နိုင်သည့် ဆရာ၊ဆရာမများ ဖြစ်စေရေးကြိုးစားကြရန်” မှာကြားခဲ့ပြီး ကျောင်းသား၊ကျောင်းသူများ အတွက် ထောက်ပံ့ငွေများပေးအပ်ခဲ့သည်။ ထို့နောက် တိုင်းဒေသကြီးဝန်ကြီးချုပ်သည် ပုသိမ်ပညာရေးဒီဂရီကောလိပ်တွင် တက်ရောက်နေသည့် ပထမနှစ် (ဒုတိယနှစ်ဝက်)ကျောင်းသူများ၏“မမပုသိမ်သူ”သီချင်းဖြင့် ကြိုဆိုကပြဖျော်ဖြေမှုနှင့် ဒုတိယနှစ်ကျောင်းသား၊ကျောင်းသူများ၏ “ထာဝရသစ္စာ”သီချင်းဖြင့် ကြိုဆိုကပြ ဖျော်ဖြေမှုများအား ကြည့်ရှုအားပေးခဲ့ပြီး ကျောင်းသား၊ကျောင်းသူများနှင့် ရင်းရင်းနှီးနှီးတွေ့ဆုံ နှုတ်ဆက်ခဲ့ကြောင်းသိရသည်။

ဧရာဝတီတိုင်းဒေသကြီး ရင်းနှီးမြှုပ်နှံမှုကော်မတီ၏ ခွင့်ပြုချက်ရရှိသည့် လုပ်ငန်းရှင်များနှင့် လုပ်ငန်းညှိနှိုင်းအစည်းအဝေးနှင့် တိုင်းဒေသကြီး ရင်းနှီးမြှုပ်နှံမှုကော်မတီ၏ (၄/၂၀၂၂)ကြိမ်မြောက် အစည်းအဝေးအား ဒီဇင်ဘာလ ၈ ရက်နေ့ နံနက်ပိုင်းက တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)၌ ပြုလုပ်ခဲ့ရာ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင်ဝန်ကြီးများ၊ သက်ဆိုင်ဌာနများနှင့် လုပ်ငန်းရှင်များ တက်ရောက်ခဲ့ကြသည်။ လုပ်ငန်းညှိနှိုင်းအစည်းအဝေးတွင် တိုင်းဒေသကြီး ဝန်ကြီးချုပ်က“တိုင်းဒေသကြီးအတွင်း လာရောက်ရင်းနှီးမြှုပ်နှံသည့် လုပ်ငန်းများတွင် အကောင်အထည်ဖော်မှု နှောင့်နှေးနေသော ကုမ္ပဏီများအနေဖြင့် အရှိန်အဟုန်မြှင့် ဆောင်ရွက်ရန်လိုပါကြောင်း၊ ယခုအချိန်တွင် အသေးစား၊ အငယ်စား၊ အလတ်စား လုပ်ငန်းများ အကောင်အထည်ဖော်လျက်ရှိရာ လုပ်ငန်းရှင်များအနေဖြင့် တိုင်းဒေသကြီး၏ စီးပွားရေးဖွံ့ဖြိုးတိုးတက်လာစေရန် သတ်မှတ်ကာလအတွင်း ပြီးစီးရန်လိုပါကြောင်း၊ မိမိတို့ လက်ရှိဆောင်ရွက်နေသည့် လုပ်ငန်းများနှင့် ပတ်သက်၍ တင်ပြဆွေးနွေးပေးကြရန် ပြောကြားခဲ့ပါသည်။ ၎င်းနောက် လုပ်ငန်းရှင်များမှ Power Pointဖြင့် ရှင်းလင်း တင်ပြခဲ့ပြီး အစည်းအဝေးသို့ တက်ရောက်လာသူများ၏ အထွေထွေဆွေးနွေး တင်ပြချက်များအပေါ် တိုင်းဒေသကြီး ဝန်ကြီးချုပ်က လိုအပ်သည်များအား ဖြည့်စွက်လမ်းညွှန်မှာကြားခဲ့ပြီး သက်ဆိုင်ဌာန မှ တာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့ကြောင်းသိရသည်။ ဆက်လက်၍ တိုင်းဒေသကြီး ရင်းနှီးမြှုပ်နှံမှုကော်မတီ၏ (၄/၂၀၂၂)ကြိမ်မြောက် အစည်းအဝေး အား ပြုလုပ်ခဲ့ရာ မြန်မာနိုင်ငံရင်းနှီးမြှုပ်နှံမှု ဥပဒေနှင့်အညီ ကုမ္ပဏီ(၃)ခုမှ တည်ဆောက်ရေး လုပ်ငန်းတိုးမြှင့်ခွင့်နှင့် တည်ဆောက်ရေးကာလ တိုးမြှင့်ခွင့် တင်ပြထားရှိမှုတို့အပေါ် ကော်မတီမှ ဆွေးနွေးဆုံးဖြတ်ခဲ့ပါသည်။