၂၀၂၆ ဩဂုတ် ၁၄

ဧရာဝတီတိုင်းဒေသကြီးဝန်ကြီးချုပ် ဦးအေးကျော်သည် ယနေ့နံနက်ပိုင်းက တာဝန်ရှိသူများနှင့် အတူ ဟင်္သာတမြို့ရေစီးရေလာကောင်းမွန်ရေးနှင့် မြို့သန့်ရှင်းသာယာလှပရေး ဆောင်ရွက်နေမှုအား ကြည့်ရှုစစ်ဆေးခဲ့သည်။ ဦးစွာ တိုင်းဒေသကြီးဝန်ကြီးချုပ်နှင့် တာဝန်ရှိသူများသည် ဟင်္သာတ-ဆုံကုန်း-မြန်အောင်လမ်း ၁ မိုင် ၁ ဖာလုံမှ ၁ မိုင် ၇ ဖာလုံအထိ ၆ ဖာလုံအား လမ်းပုခုံးနှစ်ဖက် ကွန်ကရစ်ခင်းလုပ်ငန်းဆောင်ရွက်နေမှုအား ကြည့်ရှုစစ်ဆေးပြီး လုပ်ငန်းများ သတ်မှတ်ကာလအတွင်း ပြီးစီးအောင်ဆောင်ရွက်ရန်၊ ယာဉ်/လမ်းအန္တရာယ်ကင်းရှင်းအောင် ဆောင်ရွက်ရန်နှင့် လိုအပ်သည်များ မှာကြားခဲ့သည်။

ယင်းနောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် ဟင်္သာတမြို့နယ် စည်ပင် သာယာရေးအဖွဲ့မှ ရေစီးရေလာကောင်းမွန်စေရေးအတွက် အေးမြသာယာရပ်ကွက်၊ အင်္ဂပိုလမ်း တစ်လျှောက်နှင့် မင်းရဲကျော်စွာလမ်း ခရိုင်အားကစားကွင်းတစ်လျှောက်ရှိ ရေမြောင်းများအတွင်း အမှိုက်များ ဖယ်ရှားရှင်းလင်းခြင်းလုပ်ငန်းများဆောင်ရွက်နေမှု၊ ဆက်သွယ်ရေးတိုင်များရှိ အမြင်မတင့်တယ်သောကြိုးများ ရှင်းခြင်းလုပ်ငန်းများ ဆောင်ရွက်နေမှုတို့ကို ကြည့်ရှုစစ်ဆေးခဲ့ပြီး တာဝန်ရှိသူများအား အမှိုက်များစနစ်တကျစွန့်ပစ်စေရေး၊ ပတ်ဝန်းကျင်သန့်ရှင်းမှုရှိစေရေး၊ ရေမြောင်းများ ရေစီးရေလာကောင်းမွန်ရေးအတွက် ဆောင်ရွက်ရေးမှာကြားခဲ့သည်။